Read სბს–2013 ფსალმუნები 144 Bible Online

ფსალმუნები 144 - სბს–2013 bible

ფსალმუნები 144

¹ხოტბა დავითისა. აღგამაღლებ შენ, ღმერთო ჩემო და მეფეო ჩემო, და ვაკურთხებ შენს სახელს უკუნითი უკუნისამდე.

²ყოველდღე გაკურთხებ შენ და ვადიდებ შენს სახელს უკუნითი უკუნისამდე.

³დიდია უფალი და ქებულია ფრიად, სიდიადე მისი მიუწვდომელია.

⁴თაობა თაობას უქებს შენს საქმეებს და შენს სიძლიერეს აუწყებენ.

⁵შენს დიად მშვენებას, შენს დიდებას, შენს საოცარ საქმეებს დავუკვირდები.

⁶შენს საზარელ სიძლიერეზე ილაპარაკებენ, და მე შენს სიდიადეს ვაუწყებ.

⁷შენი მრავალი სიკეთის დიდებას წარმოთქვამენ, და შენს სიმართლეს უმღერებენ.

⁸გულმოწყალე და შემბრალეა უფალი, სულგრძელი და დიდად მოწყალე.

⁹კეთილია უფალი ყველას მიმართ და მისი წყალობა ყველა მის ქმნილებაზეა.

¹⁰მადლობას მოგიძღვნის შენ, უფალო, ყველა შენი ქმნილება, და შენი წმიდანნი დაგლოცავენ შენ.

¹¹შენი მეფობის დიდებას აუწყებენ, და შენს სიძლიერეზე ილაპარაკებენ,

¹²რათა ამცნონ ადამის ძეთ შენი სიძლიერე და ბრწყინვალე დიდება შენი მეუფებისა.

¹³შენი მეფობა – მეფობაა ყველა საუკუნისა და შენი ბატონობა – თაობებში.

¹⁴უფალი შემწეა ყველა დაცემულისა და გამმართავი ყველა წელში მოხრილისა.

¹⁵ყველას თვალები შენ შემოგცქერის და შენ აძლევ მათ საზრდოს თავის დროზე.

¹⁶გახსნი შენს ხელს და დააკმაყოფილებ ყოველ სულდგმულს.

¹⁷მართალია უფალი ყველა თავის გზაზე და მოწყალეა ყველა თავის საქმეში.

¹⁸ახლოსაა უფალი ყველა მის მლოცველთან, ყოველთან, ვინც მას მოუხმობს ჭეშმარიტებით.

¹⁹მის მოშიშთა სურვილს ასრულებს, მათ ღაღადს ისმენს და შველის მათ.

²⁰იცავს უფალი ყველა მის მოყვარულს და ყველა ბოროტს მოსპობს.

²¹ხოტბას უფლისა აუწყებს პირი ჩემი, და აქებს ყოველი ხორციელი მის წმიდა სახელს უკუნითი უკუნისამდე!