Read სბს–2013 ფსალმუნები 16 Bible Online

ფსალმუნები 16 - სბს–2013 bible

ფსალმუნები 16

¹გუნდის ლოტბარს. უფლის მსახურის, დავითისა, რომელმაც წარმოთქვა უფლის მიმართ ამ გალობის სიტყვები მაშინ, როცა უფალმა იხსნა ყველა მისი მტრისა და საულის ხელთაგან. ისმინე, უფალო, სიმართლე, ყური მოაპყარ ჩემს ღაღადს, ჩემს ლოცვას უბიწო ბაგეთაგან.

²შენგან გამოვიდეს ჩემი სამართალი, შენმა თვალებმა განმჭვრიტონ სწორად!

³თუ გასინჯავ ჩემს გულს, მომინახულებ ღამით, გამომცდი, ვერ იპოვი ბოროტს ჩემში. არ შემიცოდავს ჩემი პირით სხვა ხალხის მსგავსად.

⁴თავს ვიცავდი უკუღმართი გზებისაგან შენს ბაგეთა სიტყვის თანახმად,

⁵გავამყარე ჩემი ნაბიჯები შენს გზაზე, არ გადაუხვევიათ ჩემს ტერფებს.

⁶მოგიხმობ, რადგან შენ მომისმენ მე, ღმერთო; ყური მომაპყარ, ისმინე ჩემი სიტყვები.

⁷გვიჩვენე შენი გასაოცარი წყალობა, შენი მარჯვენით მოშუღლეთაგან შენს მოიმედეთა მხსნელო.

⁸დამიფარე თვალისჩინივით, შემიფარე შენი ფრთების ქვეშ,

⁹ბოროტთაგან, რომელნიც თავს მესხმიან, მტრებისაგან, გარს რომ მერტყმიან.

¹⁰ისინი ქონში ჩაიკეტნენ, მათი ბაგეები ამპარტავნობით ლაპარაკობენ,

¹¹ყოველ ნაბიჯზე აწ გარს მერტყმიან, მითვალთვალებენ, რათა ძირს დამცენ.

¹²ლომივით, მსხვერპლი რომ სწყურია, საფარში მჯდომი ლომის ბოკვერივით.

¹³აღსდექ, უფალო, წინ გადაუდექ, დააჩოქე! იხსენი ჩემი სული ბოროტისაგან შენი მახვილით.

¹⁴იმ კაცთაგან – შენი ხელით, უფალო, – ამქვეყნიურ კაცთაგან, რომელთაც წილი ამ ცხოვრებაში აქვთ, რომელთა მუცლებსაც ავსებ შენი საგანძურებიდან; დაე გაძღნენ მათი შვილები და ნარჩენი თავიანთ შვილებს დაუტოვონ.

¹⁵მე კი სიმართლით ვიხილავ შენს სახეს, გავძღები გამოღვიძებისას შენი ხატების მზერით.