Read სბს–2013 ფსალმუნები 18 Bible Online

ფსალმუნები 18 - სბს–2013 bible

ფსალმუნები 18

¹გუნდის ლოტბარს. ფსალმუნი. დავითისა. ცანი ღაღადებენ ღმერთის დიდებას, მის ხელთა საქმეებს გვამცნობს სამყარო.

²დღე დღეს გადასცემს სიტყვას, და ღამე ღამეს უმხელს აზრს,

³არ არის ენა და არცა სიტყვა, სადაც არ ისმის მათი ხმა.

⁴მთელი დედამიწის ზურგზე გადის მათი ხმა და სამყაროს კიდეებამდე აღწევს მათი სიტყვები; მზეს დაუდგა კარავი მათში.

⁵ვითარცა ნეფე, გამოდის ის საქორწინო ტავხტრევანიდან; ვითარცა გმირი, ხარობს ის გარბენას გზისას.

⁶ცათა კიდიდან არის მისი აღმოსავალი და მისი ბრუნვა – ცათა კიდემდე, ვერაფერი ემალება მის მხურვალებას.

⁷რჯული უფლისა სრულყოფილია, სულს განამტკიცებს; მცნება უფლისა ჭეშმარიტია, სიბრძნეს ანიჭებს გულუბრყვილოებს.

⁸მართებულია უფლის ბრძანებანი, გულს ახარებენ; მცნება უფლისა სპეტაკია, შუქს აძლევს თვალებს.

⁹შიში უფლისა წმიდაა, მარადიული. უფლის განსჯანი ჭეშმარიტნი, მართალნი ერთობ.

¹⁰სასურველნი არიან ოქროზე და თვით ბაჯაღლოზე მეტად და უტკბილესნი თაფლისა და გოლეულისა.

¹¹შენი მორჩილი მათით არის განათლებული; დიდია საზღაური მათი დაცვისთვის.

¹²ვინ გულისხმა-ჰყოს შეცდომანი თვისნი? განმწმიდე მე დაფარულთაგან.

¹³უნებლიე ცოდვებს განაშორე მსახური შენი, რათა არ გაბატონდნენ ჩემზე! მაშინ უმწიკვლო ვიქნები და თავს დავაღწევ დიდ ცოდვას.

¹⁴დაე, იყოს შენთვის სასურველი ჩემი პირის სიტყვანი და ჩემი გულის ზრახვანი, უფალო, ბურჯო და მხსნელო ჩემო.