Read სბს–2013 ფსალმუნები 21 Bible Online

ფსალმუნები 21 - სბს–2013 bible

ფსალმუნები 21

¹გუნდის ლოტბარს. ცისკრის აღმობრწყინებისას. ფსალმუნი დავითისა. ღმერთო ჩემო! ღმერთო ჩემო! რად მიმატოვე? შემოგღაღადებ, მაგრამ შორს არის ჩემგან შველა.

²ღმერთო ჩემო! მოგიხმობ დღისით და არ მპასუხობ, ღამით – და არ არის სიმშვიდე ჩემთვის.

³შენ კი, წმიდა ხარ და მკვიდრობ ისრაელის ხოტბათა შორის.

⁴შენ გესავდნენ ჩვენი მამები, გესავდნენ და იხსენი კიდეც.

⁵შენ გევედრებოდნენ და გადარჩნენ; შენი იმედი ჰქონდათ და არ გაწბილდნენ.

⁶მე კი მატლი ვარ და არა კაცი, საძრახისი ადამიანთა და საძულველი ერისა.

⁷ყველა, ვინც მხედავს, დამცინის; მქირდავენ და თავს აქნევენ:

⁸„უფალს მიენდო, მაშ მანვე იხსნას, მან უშველოს თავის სასურველს!“

⁹შენ გამომიყვანე დედის მუცლიდან, დამამშვიდე დედის მკერდზე.

¹⁰შენი იმედი მქონდა დედის მუცლიდან; დედის წიაღიდან შენ ხარ ჩემი ღმერთი.

¹¹ნუ განმშორდები, რადგან ახლოა უბედურება, ხოლო შემწე არავინ არის.

¹²გარს შემომერტყნენ ძლიერი ხარები, ბაშანის ხარებმა რკალი შემომარტყეს.

¹³პირს აღებენ ჩემს წინააღმდეგ, მსხვერპლს დადევნებული და მბრდღვინავი ლომივით.

¹⁴ვითარცა წყალი დავიღვარე და დაიშალნენ ჩემი ძვლები; ცვილს დაემსგავსა ჩემი გული, დადნა ჩემს გვამში.

¹⁵გამოიფიტა ჩემი ძალა, ვითარცა თიხა; ენა სასაზე მიმეკრა, ჩამიყვანე სიკვდილის მტვერში.

¹⁶გარს შემომეხვივნენ ძაღლები; ბოროტთა ხროვა წრედ შემომერტყა, გამიხვრიტეს ხელნი და ფერხნი.

¹⁷მთელი ჩემი ძვლები დაითვლება; მომჩერებიან ნიშნის მოგებით.

¹⁸ჩემს სამოსელს ინაწილებენ და წილს იყრიან ჩემს კვართზე.

¹⁹მაგრამ შენ, უფალო, ნუ განმშორდები! სიმძლავრევ ჩემო, ჩემდა შემწედ გამოეშურე!

²⁰გადაარჩინე ჩემი სული მახვილისაგან და ძაღლთაგან ჩემი სიცოცხლე!

²¹მიხსენი ლომის ხახისაგან და გარეული ხარების რქისგან!

²²ჩემს ძმებს მოვუთხრობ შენს სახელზე, კრებულთა შორის გადიდებ შენ.

²³უფლის მოშიშნო, ადიდეთ იგი! პატივი მიაგოს მას იაკობის ჩამომავლობამ და გეშინოდეს მისი, ისრაელის მთელო მოდგმავ!

²⁴რადგან არ დაამცირა და არ უგულებელყო ტანჯვა გლახაკისა, არ მოარიდა პირი თვისი, უსმინა მას, როს მოუხმობდა.

²⁵მინდა შეგასხა ხოტბა მრავალთა კრებულში, მის მოშიშთა წინაშე გადავიხდი აღთქმულს.

²⁶შეჭამენ ღატაკნი და გაძღებიან, ადიდებენ უფალს მისი მაძიებლები; სამარადჟამოდ იცოცხლონ თქვენმა გულებმა!

²⁷გაიხსენებენ და უფალთან დაბრუნდებიან ქვეყნიერების ყველა კიდენი, და თაყვანს სცემს მას ყველა ტომი წარმართებისა.

²⁸რამეთუ უფალს ეკუთვნის მეფობა და ის არის ხალხთა მბრძანებელი.

²⁹თაყვანს სცემს ამ ქვეყნის ყველა ამაყი, მის წინაშე ქედს მოიხრის ყველა, ვინც მტვრად უნდა იქცეს, ვისაც არ ძალუძს თვისი სულის ხსნა.

³⁰შთამომავლობა ემსახურება მას; მოუთხრობს მომავალ თაობებს უფლის შესახებ.

³¹აუწყებენ მის სიმართლეს ხალხს, ჯერ არ შობილს, იმას, რაც მოიმოქმედა უფალმა.