Read სბს–2013 ფსალმუნები 30 Bible Online

ფსალმუნები 30 - სბს–2013 bible

ფსალმუნები 30

¹გუნდის ლოტბარს. ფსალმუნი. დავითისა.შენში ვეძებ ხსნას, უფალო, ნურც შევრცხვენილვარ ნურასოდეს; შენი სიმართლით გამომიხსენი.

²მომაპყარ ყური შენი, სწრაფად გადამარჩინე, იყავ ჩემთვის კლდე და ბურჯი, ციხესიმაგრე ჩემს დასახსნელად.

³რადგანაც ჩემი კლდე და ბურჯი ხარ; შენი სახელის გულისათვის მიჩვენე გზა და გამიძეხი.

⁴გამომიყვანე მახისაგან, რომელიც ჩუმად დამიგეს, რადგან შენა ხარ სიმაგრე ჩემი.

⁵შენს ხელს შევავედრებ ჩემს სულს. შენ დამიხსნი, უფალო, ღმერთო ჭეშმარიტო.

⁶შენ შეიძულე ფუჭი კერპების თაყვანისმცემლები მე კი უფალს მივენდე.

⁷ვილხენ და ვიხარებ შენი წყალობით, რადგან შენ იხილე ჩემი სისაწყლე, შეიცან ტანჯვა ჩემი სულისა.

⁸და არ მიმეცი მტრის ხელს; ფართოდ დაამკვიდრე ფერხნი ჩემნი.

⁹შემიწყალე, უფალო, რადგან მიჭირს, დაიშრიტა წუხილით თვალი ჩემი, სული ჩემი და მუცელი ჩემი.

¹⁰რადგან გაილია ნაღველში ჩემი სიცოცხლე და ჩემი წლები – გლოვაში. დაუძლურდა ჩემი ძალა ჩემი ცოდვებით და ჩემი ძვლები დაიფშხვნა.

¹¹ყველა ჩემი მტრისაგან შერცხვენილი შევიქენ, მეზობელთათვის – ძრწოლა, და საშიში ნაცნობთათვის; ვინც კი ქუჩაში დამინახავს, გარბის ჩემგან.

¹²გულიდან ამომიგდეს, ვითარცა მკვდარი; დამსხვრეულ ჭურჭელს დავემსგავსე.

¹³რადგან მესმის ცილისწამება მრავალთა, შიშია ყოველი მხრიდან! ისინი შეითქვნენ ჩემს წინააღმდეგ, ჩემი სულის ამოხდა განიზრახეს,

¹⁴მე კი შენი იმედი მაქვს, უფალო, ვთქვი: შენა ხარ ჩემი ღმერთი.

¹⁵შენს ხელთ არის ჩემი დრო-ჟამი. მიხსენ ჩემს მტერთა და მდევნელთა ხელთაგან.

¹⁶უჩვენე შენი ბრწყინვალე სახე შენს მორჩილს, გადამარჩინე შენი წყალობით.

¹⁷უფალო, ნუ შემარცხვენ, რადგან შენ მოგიხმობ. დაე, შერცხვნენ ბოროტნი და დადუმდნენ ჯოჯოხეთში.

¹⁸დაე, დამუნჯდნენ ცრუ ბაგეები, რომელნიც ქედმაღლად ლაპარაკობენ მართალზე, ამპარტავნებით და სიძულვილით.

¹⁹რაოდენ მრავალი სიკეთე გაქვს, უფალო, შენს მოშიშთათვის რომ ინახავ, შენს მსასოებელთ რომ განუმზადე ადამის ძეთა წინაშე.

²⁰შენ იფარავ მათ შენი პირის საფარველქვეშ ადამიანის ხრიკებისაგან, იცავ მათ ენით გამომწვეული დავიდარაბისგან.

²¹კურთხეულია უფალი, რადგან მომივლინა თავისი საკვირველი წყალობა გამაგრებულ ქალაქში.

²²და მე ვფიქრობდი ძრწოლით: მოწყვეტილი ვარ შენს თვალთაგან. მაგრამ შენ ისმინე ჩემი მუდარის ხმა, როცა მოგიხმე საშველად.

²³შეიყვარეთ უფალი, მისნო წმიდანო; ერთგულს იცავს უფალი და მრავალგზის მიუზღავს ამპარტავნებს.

²⁴გამხნევდით და გული გაიმაგრეთ, ყველამ, ვისაც უფლის მოლოდინი გაქვთ.