Read სბს–2013 ფსალმუნები 32 Bible Online

ფსალმუნები 32 - სბს–2013 bible

ფსალმუნები 32

¹იხარეთ უფლით, მართალნო! გულწრფელებს შეშვენით ქება.

²ადიდეთ უფალი ქნარით, ათსიმიანი ებანით უგალობეთ მას!

³უგალობეთ მას გალობა ახალი, კეთილად ააწყვეთ ჰანგი მოძახილით.

⁴რადგან სწორია უფლის სიტყვა და ყოველი მისი საქმე ჭეშმარიტია.

⁵უყვარს მას სიმართლე და სამართალი; უფლის წყალობით სავსეა ქვეყანა;

⁶უფლის სიტყვით შეიქმნა ზეცა და მისი ბაგეების სუნთქვით მთელი მისი კრებული.

⁷შეკრიბა, ვითარცა ტიკში, წყალნი ზღვისანი, საცავებში მოათავსა უფსკრულები.

⁸ეშინოდეს უფლისა მთელ დედამიწას, თრთოდეს მისგან სამყაროს ყოველი მკვიდრი.

⁹რადგან მან თქვა და მსწრაფლ შეიქმნა, მან ბრძანა და არსებობს.

¹⁰უფალი ჩაშლის ერების ზრახვებს, ხალხების ჩანაფიქრს გააცამტვერებს.

¹¹აზრი უფლისა იდგება მარადიულად, თაობიდან თაობამდე – გულისზრახვანი მისნი.

¹²ნეტარია ერი, ვისი ღმერთიც არის უფალი, ხალხი – მისგან მემკვიდრედ ამორჩეული!

¹³ზეციდან იმზირება უფალი, ხედავს ყველა ძეს კაცისა.

¹⁴თავისი საბრძანებლიდან უთვალთვალებს ქვეყნის ყველა მკვიდრს.

¹⁵ის ქმნის თვითოეულის გულს და სწვდება ყველა მათ საქმეს.

¹⁶მეფეს ვერ იხსნის ჯარის სიმრავლე, გმირს ვერ გადაარჩენს დიდი ძალა.

¹⁷უიმედოა ცხენი შველისთვის, მთელი მისი ძალა ვერ იხსნის მას.

¹⁸აი, თვალი უფლისა მის მოშიშთა თავზე, ვისაც მისი წყალობის იმედი აქვს,

¹⁹რომ იხსნის მათ სულს სიკვდილისაგან და ასაზრდოებს შიმშილის ჟამს.

²⁰ჩვენი სამშვინველი მოელის უფალს, ის არის დამხმარე და მფარველი ჩვენი.

²¹აჰა, მისით ხარობს ჩვენი გული, რადგან გვწამს მისი წმიდა სახელი.

²²იყოს ჩვენზე შენი წყალობა, უფალო, რადგანაც შენზე ვამყარებთ იმედს.