Read სბს–2013 ფსალმუნები 33 Bible Online

ფსალმუნები 33 - სბს–2013 bible

ფსალმუნები 33

¹დავითისა. როცა სიგიჟე მოიგონა აბიმელექის წინაშე, განიდევნა და წავიდა. ვადიდებ უფალს ყოველ ჟამს, მარად იქნება მისი ქება ჩემს ბაგეებზე.

²უფლით იქადის ჩემი სული; ისმინონ მშვიდებმა და გაიხარონ.

³ადიდეთ უფალი ჩემთან ერთად, ვადიდოთ მისი სახელი ერთად!

⁴მოვიძიე უფალი და მიპასუხა მან და მიხსნა ყველა განსაცდელისგან.

⁵უმზირეთ მას და გასხივოსნდით; არასოდეს არ შერცხვება პირი თქვენი.

⁶აგერ გლახაკმა მოუხმო მას და უფალმა ისმინა მისი და ყველა გასაჭირისგან იხსნა იგი.

⁷დაივანებს უფლის ანგელოზი მის მოშიშთა ირგვლივ და იხსნის მათ.

⁸განიცადეთ და ნახეთ, რომ კეთილია უფალი! ნეტარია ის, ვინც მასზეა მინდობილი.

⁹გეშინოდეთ უფლისა, წმიდანო მისნო, რადგან არა აქვთ შეჭირვება მის მოშიშთ!

¹⁰ლომის ბოკვერები იტანჯებიან და შიმშილობენ, ხოლო უფლის მაძიებლებს არავითარი სიკეთე არ მოაკლდებათ.

¹¹მოდით, შვილებო, მისმინეთ! უფლის მოშიშებას გასწავლით თქვენ.

¹²ვინ არის კაცი, რომელსაც სურს სიცოცხლე, უყვარს დღეგრძელობა სიკეთის სანახავად?

¹³შეიკავე შენი ენა სიავისაგან და ბაგენი შენნი – ცბიერ სიტყვათაგან.

¹⁴ერიდე ბოროტებას და ჰქმენ სიკეთე; ეძიე მშვიდობა და მიჰყევი მას.

¹⁵უფლის თვალები მიპყრობილია მართალთაკენ და მისი ყურები – მათი ღაღადისაკენ.

¹⁶პირი უფლისა – ბოროტმოქმედთა წინააღმდეგ, რათა წარხოცოს დედამიწიდან მათი სახსენებელი.

¹⁷მართალნი მოუხმობენ და ისმენს უფალი, იხსნის მათ ყველა გასაჭირისგან.

¹⁸ახლოა უფალი გულმოდრეკილებთან, და სულით მორჩილებს იხსნის ის.

¹⁹მრავალია სიძნელე მართლისა; მაგრამ ყველაფრისაგან იხსნის უფალი.

²⁰ის იცავს მის ყოველ ძვალს, მათგან ერთიც არ შეიმუსრება.

²¹მოკლავს ცოდვილს ბოროტება, ხოლო მართლის მოძულენი დაიგმობიან.

²²იხსნის უფალი თავის მორჩილთა სულებს, არ განისჯება მასზე მინდობილი.