Read სბს–2013 ფსალმუნები 36 Bible Online

ფსალმუნები 36 - სბს–2013 bible

ფსალმუნები 36

¹დავითისა. ნუ შეგეხარბება ბოროტმოქმედებისა, ნურც უკანონობის ჩამდენთა შეგშურდება შენ,

²რადგან ბალახივით მალე გახმებიან და მწვანილივით დაჭკნებიან.

³მიენდე უფალს და ქმენ კეთილი; მაშინ დამკვიდრდები ქვეყანაზე და იქნები უსაფრთხოდ.

⁴უფალი იყოს შენი სიხარული, ის აგისრულებს გულის საწადელს.

⁵წარმართე უფლისკენ შენი სავალი გზა, მიენდე მას და ის აღასრულებს.

⁶გამოავლენს ნათელივით სიმართლეს შენსას და შენს სამართალს – შუადღესავით.

⁷დაემორჩილე უფალს და დაელოდე მას. ნუ შეგშურდება თავის გზაზე წარმატებულის, კაცისა, რომელიც ბოროტს იზრახავს.

⁸მოეშვი რისხვას და მიატოვე გულისწყრომა! ნუ გამძვინვარდები, არ გაბოროტდე.

⁹რადგან ბოროტმოქმედნი ამოწყდებიან, ხოლო უფალზე მინდობილნი დაიმკვიდრებენ ქვეყანას.

¹⁰კიდევ ცოტა, და აღარ იქნება ბოროტი, დაუკვირდები მის ადგილს და აღარ იქნება იქ.

¹¹ხოლო თავმდაბალნი დაიმკვიდრებენ ქვეყანას და დაამდებიან დიდი მშვიდობით.

¹²ავი განზრახვა აქვს ბოროტს მართლის მიმართ და კბილებს აღრჭენს მის წინააღმდეგ.

¹³მაგრამ უფალი დასცინის მას, ვინაიდან ხედავს, რომ მოდის მისი დღე.

¹⁴მახვილი იშიშვლეს ბოროტებმა და მოზიდეს მშვილდი, რათა ძირს დასცენ ღარიბ-ღატაკი და მოსპონ გზიანები.

¹⁵მათი მახვილი მათსავე გულს განეწონება და მათი მშვილდი შეიმუსრება.

¹⁶მართლის მცირედი სჯობია უკეთურთა დიდ სიმდიდრეს.

¹⁷რადგან უკეთურთა მკლავები შეიმუსრება, მართალთა შემწე კი უფალია.

¹⁸იცის უფალმა უცოდველთა დღენი, მათი მემკვიდრეობა უკუნისამდე იქნება;

¹⁹არ შერცხვებიან სიავის ჟამს და შიმშილის დღეებში დაპურდებიან.

²⁰ბოროტნი კი დაიღუპებიან და მტერნი უფლისა, მსგავსად მინდვრის ბალახისა, გაქრებიან, კვამლივით გაქრებიან.

²¹ბოროტი სესხულობს და არ იხდის, მართალი კი შემბრალებელია და გასცემს.

²²რადგან უფლის მიერ ნაკურთხნი დაიმკვიდრებენ ქვეყანას, მის მიერ წყეულნი კი ამოწყდებიან.

²³უფლის მიერ წარიმართება კაცის ნაბიჯები, და გაამყარებს მას, ვის გზასაც შეიყვარებს.

²⁴კიდეც რომ წაბორძიკდეს, არ დაეცემა, რადგან უფალს მტკიცედ უჭირავს მისი ხელი.

²⁵ყმაწვილი ვიყავი, კიდეც მოვხუცდი და არ მინახავს მართალი კაცი მიტოვებული, და მისი მოდგმა – პურზე ხელგაწვდილი.

²⁶ის ყოველდღე მოწყალებას გაიღებს და გაასესხებს, და მისი შთამომავალი კურთხეულია.

²⁷ერიდე ბოროტს და ქმენ სიკეთე და იარსებებ სამარადჟამოდ.

²⁸რადგან უფალს უყვარს სამართალი; არ მიატოვებს თავის წმიდებს, სამარადისოდ დაცულნი იქნებიან, ბოროტთა ნაშიერი კი ამოწყდება.

²⁹მართალნი დაიმკვიდრებენ ქვეყანას და იქნებიან მასზე უკუნისამდე.

³⁰მართლის ბაგენი სიბრძნეს წარმოთქვამენ და მისი ენა სიმართლეს ამბობს.

³¹მისი ღმერთის რჯული მის გულშია, არ დაუსხლტება ნაბიჯები.

³²ბოროტი უთვალთვალებს წმიდას და მის მოკვლას აპირებს.

³³მაგრამ უფალი არ მიატოვებს მას მის კლანჭებში და არ გაამტყუნებს მას სამსჯავროზე.

³⁴მიენდე უფალს, დარჩი მის გზაზე და ის აგამაღლებს, რომ დაიმკვიდრო ქვეყანა; იხილავ უკეთურთა განადგურებას.

³⁵მინახავს ბოროტი გამძვინვარებული, ფესვგადგმული, ვითარცა ლიბანის კედარი.

³⁶მაგრამ ჩავაიარე, და აჰა, აღარ არის, დავეძებ მას და ვეღარ ვპოულობ.

³⁷დაუკვირდი უმანკოს და უმზირე მართალს, რადგან მშვიდობიან კაცს ეკუთვნის მომავალი.

³⁸ხოლო ბრალეულნი ერთიანად მოისპობიან, ბოროტთა მომავალი გადაშენდება.

³⁹მართალთა შველა კი უფლისგან არის, ის არის მათი მფარველი გაჭირვების ჟამს.

⁴⁰ეხმარება მათ უფალი და იხსნის; იხსნის ბოროტთაგან და შველის, რადგან მასზე არიან მინდობილნი.