Read სბს–2013 ფსალმუნები 37 Bible Online

ფსალმუნები 37 - სბს–2013 bible

ფსალმუნები 37

¹ფსალმუნი დავითისა. გასახსენებელი.უფალო, შენი რიხსვით ნუ მამხილებ, და ნუ დამსჯი განრისხების ჟამს!

²რადგან შენი ისრები ჩემშია განწონილი და შენი ხელი მამძიმებს მე.

³აღარ არის ჯანსაღი ადგილი ჩემს სხეულში შენი რისხვის გამო; აღარ არის სისაღე ჩემს ძვლებში ჩემი ცოდვის გამო.

⁴რადგან ცოდვანი ჩემნი ასცილდნენ ჩემს თავს, მძიმე ტვირთად დამძიმდნენ ჩემზე.

⁵აყროლდნენ, დალპნენ ჩემი წყლულები ჩემი უგუნურების გამო.

⁶წელში მოვიხარე, დავმდაბლდი, მთელ დღეს ნაღვლიანი დავიარები.

⁷რადგან ჩემი წელი გათანგულია სიცხით და აღარ არის ჯანსაღი ადგილი ჩემს სხეულში.

⁸დავუძლურდი და დავძაბუნდი მეტისმეტად, ვღრიალებ ჩემი გულის სატკივარით.

⁹უფალო, შენს წინაშეა ყველა ჩემი სურვილი, ჩემი ოხვრა დაფარული არ არის შენგან.

¹⁰ჩემი გული თრთის, ძალღონემ დამტოვა, ჩემს თვალთა სინათლე – აღარც ის არის ჩემთან.

¹¹მოყვარულნი და მეგობარნი განერიდნენ ჩემს წყლულებს, და ახლობლები შორს განმიდგნენ.

¹²მახეს მიგებენ ჩემი სულის მაძიებლები, ჩემი სიავის მსურველები ბჭობენ ჩემს დასაღუპად და მთელ დღეს მზაკვრობას განიზრახავენ.

¹³მე კი არ მესმის, ვითარცა ყრუს და ვითარცა მუნჯს, პირს რომ ვერ აღებს.

¹⁴დავემსგავსე კაცს, რომელსაც არ ესმის და რომლის ბაგეებსაც არ შეუძლიათ პასუხის გაცემა.

¹⁵მაგრამ მე შენ გელოდები, უფალო, შენ მიპასუხებ, უფალო, ღმერთო ჩემო.

¹⁶გევედრები: ნუ გაახარებ მათ ჩემზე, თუ ფეხი გადამიბრუნდა, ნუ გააბატონებ ჩემზე!

¹⁷რადგან მარცხი მემუქრება და ჩემი სატკივარი მუდამ ჩემთანაა.

¹⁸ჩემს ბრალს ვაცხადებ, ვწუხვარ ჩემი ცოდვის გამო.

¹⁹უსამართლოდ გადამტრებულები კი ძლიერდებიან, მრავლდებიან ჩემი ამაოდ მოძულენი.

²⁰კეთილის წილ ბოროტის გადამხდელნი მმტრობენ იმისთვის, რომ კეთილს ვცდილობ.

²¹ნუ მიმატოვებ, უფალო! ღმერთო ჩემო, ნუ განმშორდები!

²²გამოეშურე ჩემს შესაწევნად, უფალო, მხსნელო ჩემო!