Read სბს–2013 ფსალმუნები 38 Bible Online

ფსალმუნები 38 - სბს–2013 bible

ფსალმუნები 38

¹გუნდის ლოტბარს, იედუთუნს. დავითის ფსალმუნი.ვთქვი: „დავიცავ ჩემს გზებს, რომ არ შევცოდო ჩემი ენით; ალიკაპს ავიკრავ პირზე, ვიდრე ბოროტნი იმყოფებიან ჩემს სიახლოვეს.“

²მთლიანად დავმუნჯდი, დავდუმდი, მშვიდობას ვიცავდი, მაგრამ ვაება გამიძლიერდა.

³გახურდა გული ჩემს შიგნით, ჩემს აზრებში ცეცხლი აღეგზნო; მაშინ დავიწყე ლაპარაკი ჩემი ენით:

⁴„მაუწყე, უფალო, ჩემი აღსასრული, ჩემი დღეების ხანგრძლივობა, მაუწყე, რა არის ჩემი ბედისწერა!

⁵აჰა, გოჯებით მომეცი დღენი, ჩემი სიცოცხლის ხანი არაფერია შენს წინაშე; ჭეშმარიტად, ერთი ამოსუნთქვაა კაცის სიცოცხლე!

⁶ჭეშმარიტად, აჩრდილივით დაეხეტება ადამიანი, ამაოდ ფაციფუცობს, აგროვებს და არ იცის, ვის დარჩება!

⁷ახლა კი, რას ველი, უფალო? შენა ხარ ჩემი იმედი.

⁸მიხსენ ყოველი ჩემი ბრალისაგან, ნუ გამხდი ბრიყვის სალანძღავად!“

⁹დავდუმდი, ბაგეებს ვეღარ ვხსნი, რადგან ასე ჰქმენ შენ.

¹⁰ამარიდე სასჯელი შენი; გავილიე შენი ხელის დარტყმებისაგან.

¹¹თუ ცოდვის მხილებით დასჯი ადამიანს, ჩრჩილივით შეჭამ ყველა მის სურვილს; ჭეშმარიტად, მხოლოდ ამაოებაა ყოველი კაცი!

¹²ისმინე ჩემი ლოცვა, უფალო, და ჩემს ვედრებას ყური მოაპყარ; ნუ დადუმდები ჩემი ცრემლების მიმართ, რადგან მწირი ვარ შენი, ხიზანი, ვითარცა ჩემი მამა-პაპანი.

¹³მზერა მომაცილე, რათა მოვმაგრდე, ვიდრე წავალ და აღარ ვიქნები!