Read სბს–2013 ფსალმუნები 39 Bible Online

ფსალმუნები 39 - სბს–2013 bible

ფსალმუნები 39

¹გუნდის ლოტბარს. დავითის ფსალმუნი. მტკიცედ ვესავდი უფალს; ყური მომაპყრო და შეისმინა ჩემი ვედრება,

²ამომიყვანა საზარელი ორმოდან, გაუვალი ლაფიდან, დააყენა კლდეზე ფეხნი ჩემნი, განამტკიცა ნაბიჯნი ჩემნი,

³მისცა ჩემს ბაგეებს ახალი გალობა ჩვენი ღმერთის სადიდებლად. მრავალნი იხილავენ და შეშინდებიან, და მიენდობიან უფალს.

⁴ნეტარ არს კაცი, ვინც უფალზე ამყარებს იმედს, ვინც არ მისდევს კადნიერთ და გზას არ ასცდება ცრუ ღმერთების მოყვარულთა მსგავსად.

⁵შენ გაამრავლე, უფალო, ღმერთო ჩემო, შენი სასწაულები და შენი ჩანაფიქრები ჩვენთვის; ვინ შეგედრება შენ! ვიქადაგებ და ვილაპარაკებ მათზე; – მაგრამ ძნელია სათქმელად.

⁶მსხვერპლი და შესაწირავი არ ისურვე; მაგრამ ყური გამიმახვილე; სრულადდასაწველი და ცოდვის მსხვერპლი არ მოგითხოვია;

⁷მაშინ ვთქვი: „აჰა, მოვედი; წიგნის გრაგნილში წერია ჩემზე.

⁸შენი სურვილის შესრულება მწადია, ღმერთო, და რჯული შენი ჩემს გულშია.“

⁹შენს სიმართლეს მოვუთხრობდი დიდ კრებულს, აჰა, ბაგენი ჩემნი არ მომიკუმავს, უფალო, შენ უწყი.

¹⁰შენი სიმართლე არ დამიფარავს ჩემს გულში; შენს ერთგულებასა და შენს ხსნაზე ვლაპარაკობდი; შენი წყალობა და ჭეშმარიტება არ დამიმალავს დიდი კრებულის წინაშე.

¹¹უფალო, ნუ მომაკლებ შენს წყალობას; შენი მადლი და შენი ჭეშმარიტება მუდამ მიცავენ მე!

¹²რადგან გარს მერტყმის აურაცხელი უბედურება, წამომეწივნენ ცოდვანი ჩემნი, აღარ ძალმიძს მე გზის დანახვა; ჩემი თმის ბეწვებზე მეტად მომრავლდნენ და გული ჩამწყდა.

¹³ისურვე, უფალო, ჩემი ხსნა! უფალო, ჩემს დასახმარებლად გამოეშურე!

¹⁴დაე, შერცხვნენ და გაწბილდნენ ჩემი სიცოცხლის დაღუპვის მაძიებელნი, უკუიქცნენ და წახდნენ ჩემი ავის მდომნი;

¹⁵დაე, შეძრწუნდნენ სირცხვილისაგან, ვინც მეუბნებოდა: ოჰო, ოჰო!

¹⁶გაიხაროს და გამხიარულდეს ყველა, ვინც შენ გეძიებს; შენი ხსნის მოყვარულებმა თქვან მუდამ: დიდია უფალი!

¹⁷ხოლო მე კი ღარიბ-ღატაკი ვარ; მაგრამ უფალი ფიქრობს ჩემზე. შენა ხარ ჩემი დამხმარე და მხსნელი, ღმერთო ჩემო, ნუ დააყოვნებ!