Read სბს–2013 ფსალმუნები 43 Bible Online

ფსალმუნები 43 - სბს–2013 bible

ფსალმუნები 43

¹გუნდის ლოტბარს. კორახის ძეთა მოძღვრება. ღმერთო, ჩვენი ყურით მოვისმინეთ, ჩვენი მამები გვიამბობდნენ, რა საქმენი მოიმოქმედე მათ დღეებში, უძველეს დროში.

²შენი ხელით განდევნე წარმართნი, ხოლო ისინი დანერგე; გაანადგურე ერები და განდევნე, ისინი კი გააფართოვე.

³ვინაიდან მათ ხმლით კი არ მოუპოვებიათ ქვეყანა, და არც მათ მკლავებს მოუტანია მათთვის გამარჯვება, არამედ შენმა მარჯვენამ, შენმა მკლავმა და შენი სახის ნათელმა, რადგან მათდამი კეთილგანეწყვე.

⁴შენა ხარ ჩემი ხელმწიფე და ჩემი ღმერთი, შენ უბოძებ შველას იაკობს.

⁵შენით ვანარცხებთ ჩვენს მტრებს; შენი სახელით ვთრგუნავთ ჩვენს მოდავეებს.

⁶რადგან ჩემს მშვილდზე არა ვარ დანდობილი და ვერც ჩემი მახვილი მიხსნის,

⁷არამედ შენ გვიხსენი ჩვენი მტრებისაგან და ჩვენი მოძულეები შეარცხვინე.

⁸ღმერთით ვიქადოდით დღეყოველ და შენს სახელს ვადიდებთ უკუნისამდე.

⁹მაგრამ მიგვატოვე და დაგვამცირე, და არ გამოხვედი ჩვენს მხედრობასთან.

¹⁰უკუგვაქციე მტრისაგან, და მოძულეებმა გაგვძარცვეს ჩვენ.

¹¹მიგვეცი, როგოც ცხვარი, შესაჭმელად, გაგვფანტე ერებს შორის.

¹²გაყიდე შენი ერი სარგებლის გარეშე, არ იდავე მათ ფასზე.

¹³მიგვეცი შესარცხვენად მეზობლებს, დასაცინად და საგინებლად – ირგვლივ მყოფთ.

¹⁴იგავად გვაქციე ერებს შორის, თავის საქნევად ხალხებს შორის.

¹⁵დღეყოველ ჩემი აუგი ჩემს წინაშეა, და სირცხვილი მიფარავს სახეს

¹⁶დამცინავისა და მაგინებელის ხმისაგან, მტრისა და შურისმაძიებლისაგან.

¹⁷ყოველივე ეს გვეწია ჩვენ, თუმცა არ დაგვივიწყებიხარ, და არ გაგვიმრუდებია შენი აღთქმა.

¹⁸არ უკუქცეულან ჩვენი გულები, და არც ჩვენს ტერფებს გადაუხვევიათ შენი ბილიკიდან.

¹⁹და მაინც შეგვმუსრე ტურების ადგილას და გადაგვაფარე წყვდიადის ჩრდილი.

²⁰ჩვენ რომ დაგვევიწყებინა სახელი ჩვენი ღმერთისა, და ხელი გაგვეშვირა უცხო კერპებისაკენ,

²¹განა ღმერთი არ გვაზღვევინებდა ამას? რადგან მან იცის საიდუმლონი გულისა.

²²შენი გულისთვის გვხოცავენ ყოველდღე; დასაკლავ ცხვრებად მიგვიჩნიეს.

²³გამოიღვიძე, რატომ გძინავს, უფალო? გამოფხიზლდი, სამუდამოდ ნუ მიგვატოვებ!

²⁴რატომ იფარავ სახეს და ივიწყებ ჩვენს მწუხარებას და გასაჭირს?

²⁵რადგან ჩვენი სული მტვრამდეა დამდაბლებული, მიწას განერთხა ჩვენი სხეული.

²⁶აღსდექ! გამოეშურე ჩვენს საშველად! გვიხსენი შენი წყალობისათვის!