Read სბს–2013 ფსალმუნები 44 Bible Online

ფსალმუნები 44 - სბს–2013 bible

ფსალმუნები 44

¹გუნდის ლოტბარს. შოშანისებურად. კორახის ძეთა. მოძღვრება; გალობა სიყვარულისა. აღივსო ჩემი გული კეთილი სიტყვებით; ჩემი სიმღერა მეფეს ეკუთვნის; ჩემი ენა კალამია ხელოვანი მწერლისა.

²ადამის ძეთა შორის უმშვენიერესი ხარ, მადლი იღვრება შენს ბაგეთაგან, რადგან გაკურთხა ღმერთმა უკუნისამდე.

³შეიბ მახვილი წელზე, გმირო, შენი დიდებით და მშვენიერებით!

⁴შენი დიდებით დაბრძანდი ეტლზე ჭეშმარიტების, თვინიერებისა და სიმართლისათვის, გვაჩვენოს საოცრებანი მარჯვენამ შენმა!

⁵შენი ისრები წამახულია, გულში ერჭობიან მეფის მტრებს, ხალხები ეცემიან შენს ფეხქვეშ.

⁶ტახტი შენი, ღმერთო, უკუნითი უკუნისამდეა. სამართლის კვერთხია კვერთხი შენი მეუფებისა.

⁷შენ შეიყვარე სიმართლე და შეიძულე ბოროტება; ამიტომ გცხო ღმერთმა, შენმა ღმერთმა, სიხარულის ზეთი შენს მეგობრებზე მეტად.

⁸მთელი შენი სამოსი – ვითარცა მური, ალოე და კასია; სპილოს ძვლის დარბაზებიდან ქნართა ხმა გაგამხიარულებს შენ.

⁹მეფეთა ასულნი შენს დიდებულებს შორის არიან; შენს მარჯვნივ დადგა დედოფალი ოფირის ოქროთი შემკული.

¹⁰მისმინე, ასულო, მოიხედე და მომაპყარ ყური. დაივიწყე ხალხი შენი და სახლი მამაშენისა.

¹¹დატკბება მეფე შენი მშვენებით. რადგან ის არის შენი უფალი, თაყვანი ეცი მას.

¹²ასული ცორისა ძღვენით მოვა შენთან; ხალხთა მდიდარნი ყოველგვარი განძით;

¹³დიდებულია მეფის ასული მთლიანად შიგნით; ოქრონართისაა მისი სამოსი.

¹⁴მოქარგული კაბით მოჰყავთ იგი მეფესთან; უკან მოჰყვებიან ქალწულნი, დობილნი მისნი.

¹⁵სიხარულით და ლხენით შედიან მეფის სასახლეში.

¹⁶შენს წინაპართა ადგილას იქნებიან შენი ძენი; მათ დააყენებ მთავრებად მთელ ქვეყანაზე.

¹⁷დავაფუძნებ შენს სახელს თაობიდან თაობაში, ამიტომ ხალხები ხოტბას შეგასხამენ უკუნითი უკუნისამდე.