Read სბს–2013 ფსალმუნები 45 Bible Online

ფსალმუნები 45 - სბს–2013 bible

ფსალმუნები 45

¹გუნდის ლოტბარს. კორახის ძეთა. ყალამოთის ხმაზე. გალობა. ღმერთია ჩვენი მფარველი და ძალა, სწრაფი შემწე გასაჭირში.

²ამიტომ არ შეგვეშინდება, ქვეყნიერებაც რომ შეიცვალოს, მთები რომ იძრნენ ზღვათა შუაგულში.

³თუნდ იხმაურონ, იბობოქრონ მათმა წყლებმა. მთები ირყეოდნენ მათი მღელვარებისგან.

⁴არსებობს მდინარე, რომლის ნაკადებიც ახარებენ ღმერთის ქალაქს, წმიდა სადგომს უზენაესისას.

⁵ღმერთი მის შუაგულშია; ის არ შეიძვრის, განთიადზევე მოვა ღმერთი მის დასახმარებლად.

⁶ღრიალებენ ერები, ზანზარებენ სამეფონი; როდესაც ის ხმას გამოსცემს, ლღვება დედამიწა.

⁷ძალთა უფალი ჩვენთანაა; ჩვენი ბურჯია ღმერთი იაკობისა.

⁸მოდით, იხილეთ საქმენი უფლისანი, როგორ გააპარტახა დედამიწა.

⁹ის წყვეტს ომებს დედამიწის კიდემდე, მშვილდს მუსრავს და შუბს ამსხვრევს, ეტლებს ბუგავს ცეცხლით.

¹⁰შეჩერდით და შეიცანით, რომ მე ვარ ღმერთი: ამაღლებული ერებს შორის, ამაღლებული ქვეყნიერებაზე.

¹¹ძალთა უფალი ჩვენთან არის; ჩვენი ბურჯია ღმერთი იაკობისა.