Read სბს–2013 ფსალმუნები 47 Bible Online

ფსალმუნები 47 - სბს–2013 bible

ფსალმუნები 47

¹გალობა; ფსალმუნი კორახის ძეთა. დიდია უფალი, და დიდად საქებარი ღმერთის ქალაქში!

²მისი წმიდა მთა მშვენივრადაა აღმართული, სიხარულია მთელი ქვეყნიერებისა; მთა სიონისა, ჩრდილოეთ მხარეს, ქალაქია დიდი მეფისა.

³ღმერთი თავის სიმაგრეებში გამოგვეცხადა, ვითარცა საიმედო მცველი.

⁴რადგან აგერ, შეიკრიბნენ მეფენი და მოვიდნენ ერთად.

⁵მაგრამ რომ ნახეს, განცვიფრდნენ, შეძრწუნდნენ და გაიქცნენ.

⁶ძრწოლამ შეიპყრო, იკლაკნებიან მშობიარესავით.

⁷აღმოსავლეთის ქარით შემუსრე შენ თარშიშის ხომალდები.

⁸როგორც ვისმინეთ, ისე ვიხილეთ ძალთა უფლის ქალაქში, ჩვენი ღმერთის ქალაქში. ღმერთმა დააფუძნა ის უკუნისამდე.

⁹ვფიქრობდით, ღმერთო, შენს წყალობაზე შენი ტაძრის შუაგულში.

¹⁰ვითარცა სახელი შენი, ღმერთო, შენი დიდებაც დედამიწის კიდით-კიდემდეა; სავსეა გამარჯვებით შენი მარჯვენა.

¹¹დაე იხაროს სიონის მთამ! იმხიარულონ იუდას ქალწულებმა შენი სიმართლის გამო!

¹²მიეახლეთ ყოველი მხრიდან და გარს შემოუარეთ სიონს; დათვალეთ მისი კოშკები.

¹³გული მიაპყარით მის სიმაგრეებს; დაიარეთ მისი დარბაზები, რათა უამბოთ მომავალ თაობას,

¹⁴რომ ის არის ღმერთი, ჩვენი ღმერთი სამარადჟამოდ. ის იქნება ჩვენი წინამძღოლი უკუნითი უკუნისამდე.