Read სბს–2013 ფსალმუნები 48 Bible Online

ფსალმუნები 48 - სბს–2013 bible

ფსალმუნები 48

¹გუნდის ლოტბარს. კორახის ძეთა. ფსალმუნი. ისმინეთ ეს, ყოველნო ერნო, ყური მოაპყართ, ქვეყნიერების ყველა მცხოვრებნო:

²უბრალოებმაც, დიდგვაროვნებმაც, მდიდარმა და ღარიბმა ერთად!

³ჩემი პირი წარმოთქვამს სიბრძნეს, ჩემი გულის განსჯა – გონიერებას.

⁴ყურს მივუგდებ იგავს, ქნარზე ამოვხსნი ჩემს გამოცანას.

⁵რად უნდა შემეშინდეს უბედურების ჟამს, როცა ჩემი მოდავეების ბოროტება გარს შემომეხვევა,

⁶რომელთაც თავიანთი ძალის იმედი აქვთ და უხვი სიმდიდრით იკვეხნიან?

⁷ძმა დახსნით ვერ დაიხსნის კაცს, ვერ მისცემს ღმერთს მის გამოსასყიდს.

⁸რადგან ძვირია მისი სულის გამოსახსნელი, ვერ გადაიხდის იმდენს უკუნისამდე,

⁹რომ ცოცხალი დარჩეს სამარადისოდ და აცდეს საფლავი.

¹⁰აჰა, დაინახავს, რომ ბრძენნიც იხოცებიან, ისევე, როგორც ბრიყვნი და სულელნი, და თავიანთ დოვლათს სხვას უტოვებენ.

¹¹საფლავებია მათი სამუდამო სახლი, მათი საცხოვრებელი თაობათა მანძილზე; თუმცა საკუთარ სახელებს უწოდებდნენ თავიანთ მამულებს.

¹²ვერ შეინარჩუნებს ადამიანი პატივს; დასაკლავი პირუტყვის მსგავსია იგი.

¹³ასეთია გზა უგუნურთა და თვითკმაყოფილთა დასასრული.

¹⁴ცხვრებივით ჯოჯოხეთის კერძნი არიან; სიკვდილი იქნება მათი მწყემსი, პირდაპირ საფლავში ჩაეშვებიან, მათი კვალიც კი აღარ დარჩება, ჯოჯოხეთი იქნება მათი სადგომი.

¹⁵ხოლო ჩემს სულს ღმერთი დაიხსნის ჯოჯოხეთიდან, რადგან მიმიღებს მე.

¹⁶ნუ შეგეშინდება, თუ კაცი გამდიდრდა, თუ გამრავლდა მისი სახლის დიდება.

¹⁷რადგან, როცა მოკვდება, თან ვერაფერს წაიღებს, თან არ ჩაჰყვება მისი დიდება.

¹⁸თუმცა სიცოცხლეში თავს ბედნიერად თვლის, – რადგან აქებენ იმას, ვინც კეთილს უკეთებს საკუთარ თავს.

¹⁹ის მივა თავისი მამების მოდგმასთან, რომელნიც ვერასოდეს ვერ იხილავენ სინათლეს.

²⁰ვერ შეინარჩუნებს ადამიანი პატივს; დასაკლავი პირუტყვის მსგავსია იგი.