Read სბს–2013 ფსალმუნები 5 Bible Online

ფსალმუნები 5 - სბს–2013 bible

ფსალმუნები 5

¹ლოტბარს. სალამურზე. დავითის ფსალმუნი. ყურად იღე, უფალო, ჩემი სიტყვები, ჩასწვდი ჩემს გულისთქმას.

²ისმინე ჩემი ღაღადი, მეუფევ ჩემო და ღმერთო ჩემო!

³შენს მიმართ ვლოცულობ, უფალო! განთიადზე გესმის შენ ჩემი ხმა, განთიადზე ვამზადებ ჩემს მსხვერპლს და გელოდები.

⁴რადგან შენ არა ხარ ბოროტების მოყვარული ღმერთი; ცოდვილი ვერ დაისადგურებს შენთან;

⁵ვერ დადგებიან ქედმაღალნი შენს წინაშე: შენ გძულს უსამართლობის ჩამდენნი.

⁶შენ ანადგურებ სიცრუის მთქმელებს; სისხლისმსმელებს და მაოხრებლებს განიშორებს უფალი.

⁷მე კი შენი უხვი წყალობით მოვალ შენს სახლში, ვეთაყვანები შენს წმიდა ტაძარს – შენდამი შიშით.

⁸უფალო, მატარე შენი სიმართლის გზით ჩემს მტერთა გამო, გაასწორე შენი გზა ჩემს წინაშე.

⁹რადგან არ არის ჭეშმარიტება მათ ბაგეებზე, ბილწია მათი შიგნეულობა, მათი ხორხი ღია საფლავია, მათი ენები – მაცდუნებელნი.

¹⁰განსაჯე ისინი, ღმერთო, დაე დაღუპონ ისინი მათმა ზრახვებმა; მათი ცოდვების სიმრავლის გამო განიშორე ისინი, რადგან აღდგნენ შენს წინააღმდეგ.

¹¹ყველა შენზე მონდობილმა კი იხაროს, იმხიარულოს უკუნისამდე; შენ დაიცავ მათ, გაიხარებენ შენით შენი სახელის მოყვარულნი.

¹²რადგან შენ აკურთხებ მართალს, უფალო, ჯავშანივით მოსავ მას შენი წყალობით.