Read სბს–2013 ფსალმუნები 50 Bible Online

ფსალმუნები 50 - სბს–2013 bible

ფსალმუნები 50

¹გუნდის ლოტბარს. დავითის ფსალმუნი. რაჟამს მივიდა მასთან ნათან წინასწარმეტყველი, მას შემდეგ, რაც ბათშებაყთან შევიდა. შემიწყალე, ღმერთო, შენი სათნოებისამებრ, შენი მრავალმოწყალებით წაშალე ჩემი დანაშაული.

²სრულად განმბანე ჩემი ბრალისგან და ჩემი ცოდვისაგან განმწმინდე მე!

³რადგან ვიცი ჩემი დანაშაული, და ჩემი ცოდვა მუდამ ჩემს თვალწინაა.

⁴შენ, მხოლოდ შენ შეგცოდე და ბოროტება შენს თვალ წინ ჩავიდინე, ამიტომ მართალია შენი მსჯავრი და სწორია შენი სამართალი.

⁵აჰა, უკანონოდ ჩავისახე და ცოდვით დაორსულდა დედაჩემი ჩემზე.

⁶აჰა, შენ შეიყვარე ჭეშმარიტება გულით, შენ მასწავლი დაფარულ სიბრძნეს.

⁷მასხურე მე უსუპით და განვიწმინდები; განმბანე და თოვლზე მეტად განვსპეტაკდები.

⁸აღმავსე ლხენითა და სიხარულით, გაახარე ჩემი ძვლები, შენ რომ დათრგუნე.

⁹აარიდე სახე ჩემს შეცდომებს და ყველა ჩემი ბრალი წაშალე.

¹⁰წმიდა გული შეჰქმენ ჩემში, ღმერთო, და წრფელი სული განმიახლე ჩემს სხეულში.

¹¹ნუ უკუმაგდებ შენგან და ნუ წამართმევ შენი სიწმინდის სულს.

¹²დამიბრუნე შენი ხსნის სიხარული, და მძლავრი სულით განმამტკიცე.

¹³მაშინ ვასწავლი დამნაშავეებს შენს გზებს, და ცოდვილნი შენთან დაბრუნდებიან.

¹⁴მიხსენ სისხლთაგან, ღმერთო, ღმერთო ჩემი ხსნისა, და ჩემი ენა ხოტბას შეასხამს შენს ხსნას.

¹⁵უფალო, გახსენი ჩემი ბაგენი, და ჩემი პირი იტყვის შენს ქებას.

¹⁶რადგან მსხვერპლი არა გსურს, და სრულადდასაწველს არ ინებებ.

¹⁷შესაწირავი ღმერთისა არის სული მოდრეკილი; მოდრეკილსა და მორჩილ გულს არ დაამცირებ, ღმერთო.

¹⁸სიკეთე უყავ შენი კეთილგანწყობით სიონს, აღადგინე გალავნები იერუსალიმისა.

¹⁹მაშინ ისურვებ სიმართლის შესაწირავებს და სრულადდასაწველს; მაშინ აიტანენ შენს სამსხვერპლოზე ზვარაკებს.