Read სბს–2013 ფსალმუნები 54 Bible Online

ფსალმუნები 54 - სბს–2013 bible

ფსალმუნები 54

¹გუნდის ლოტბარს. სიმებიან საკრავზე. მოძღვრება დავითისა. ისმინე, ღმერთო, ჩემი ლოცვა, ნუ დაემალები ჩემს ვედრებას!

²ყური მომაპყარ და მიპასუხე; მწუხარება დამეუფლა,

³გონება დავკარგე მტრის ხმისაგან, ბოროტთა შევიწროებისაგან, რადგან სიმრუდეს მაბრალებენ და სიძულვილით მირისხდებიან.

⁴ჩემი გული თრთის ჩემს შიგნით, სიკვდილის საშინელება დამატყდა თავს.

⁵შიში და ძრწოლა დამეუფლა და შიშის ზარი მიპყრობს.

⁶და ვამბობ: ო, რომ მქონოდა მტრედის ფრთები! გავფრინდებოდი და სიმშვიდეს მოვიპოვებდი;

⁷შორს, შორს გადავიხვეწებოდი, უდაბნოში დავიდებდი ბინას;

⁸ვიჩქარებდი, რომ მეპოვა თავშესაფარი მრისხანე ქარიშხლისაგან.

⁹ჩაშალე მათი გეგმები, უფალო, დაყავი მათი ენები; რადგანაც ვხედავ ძალადობას და შუღლს ქალაქში.

¹⁰დღედაღამ გარს უვლიან მის კედლებს, სიმრუდე და უბედურებაა მასში,

¹¹ნგრევაა მის შუაგულში, არ სცილდება მის ქუჩებს სიცრუე და ვერაგობა.

¹²ვინც მე მლანძღავს, ჩემი მტერი არ არის – ამას ავიტანდი; ჩემი მოძულენი კი არ განდიდებულან ჩემზე – მათ დავემალებოდი;

¹³არამედ ეს შენ ხარ, კაცი, ჩემი სწორი, ამხანაგი და მეგობარი ჩემი,

¹⁴ერთად რომ ვსაუბრობდით ტკბილად, ღვთის სახლში დავდიოდით მეგობრულად.

¹⁵დაატყდეს მათ სიკვდილი, ცოცხლად ჩავიდნენ ჯოჯოხეთში, რადგან ბოროტებაა მათ სადგომში, მათ გულში.

¹⁶მე კი ღმერთს მოვუხმობ, და უფალი მიშველის.

¹⁷საღამოს, დილით და შუადღისას შევევედრები და შევტირებ და ის შეისმენს ჩემს ხმას.

¹⁸მშვიდობით გადაარჩენს ჩემს სულს მათგან, მე რომ მებრძვიან, რადგან ბევრნი არიან ჩემზე აღმდგარნი.

¹⁹შეისმენს ღმერთი, მოათვინიერებს მათ დასაბამიდან მყოფი; რადგან არ არის ცვლილება მათში და არა აქვთ შიში ღმერთისა.

²⁰მან ხელი გაიწოდა მისთვის მშვიდობის მსურველთა წინააღმდეგ, აღთქმა დაარღვია.

²¹ქონზე ჩვილია მისი ბაგენი, გულში კი ომი აქვს; ზეთზე რბილია მისი სიტყვები, მაგრამ ისინი გაშიშვლებული ხმლებია.

²²მიანდე უფალს შენი ბედი და ის განგამტკიცებს, არასოდეს არ დაუშვებს მართლის წაბორძიკებას.

²³ღმერთო, შენ ჩაიყვან მათ უძირო უფსკრულში; სისხლის მოყვარულნი და ვერაგნი ვერ მიაღწევენ თავიანთ დღეთა ნახევარს. მე კი შენ გესავ.