Read სბს–2013 ფსალმუნები 55 Bible Online

ფსალმუნები 55 - სბს–2013 bible

ფსალმუნები 55

¹გუნდის ლოტბარს. მტრედზე, რომელიც მდუმარებს შორეთში. დავითის ძეგლისწერა, როცა ფილისტიმელებმა შეიპყრეს იგი გათში. შემიწყალე, ღმერთო, რადგან გათელვას მიპირებს კაცი, ყოველდღე მავიწროებს მოშუღარი.

²ჩემი მტრები მთრგუნავენ ყოველდღიურად, მრავალი მეომება ამპარტავნებით.

³საშიშროების დღეს შენ მოგენდობი –

⁴ღმერთს, რომლის სიტყვასაც ვადიდებ; ღმერთს ვარ მინდობილი და არ მეშინია, რას მიზამს ხორციელი?

⁵დღენიადაგ ამახინჯებენ ჩემს სიტყვებს; ავია ყოველი მათი ზრახვა ჩემს მიმართ.

⁶გროვდებიან, მისაფრდებიან, ჩემს ნაკვალევს უთვალთვალებენ, თითქოსდა ჩემს სულს ელოდებიან.

⁷ნუთუ ამ სიმრუდეს უნდა გადაურჩნენ? რისხვით დაამხე ხალხები, ღმერთო!

⁸ჩემი ხეტიალი აღრიცხული გაქვს; შენს ჭურჭელში მოათავსე ჩემი ცრემლები, – განა შენს წიგნში არ არიან ისინი?

⁹უკუიქცევიან ჩემი მტრები, რა დღესაც მოგიხმობ; ვიცი, რომ ღმერთი ჩემთან არის.

¹⁰ღმერთს, რომლის სიტყვასაც ვაქებ, უფალს, რომლის სიტყვასაც ვადიდებ,

¹¹ღმერთს მივენდე – არ მეშინია; რას მიზამს კაცი?

¹²ჩემს აღთქმებს შენდამი აღვასრულებ, ო ღმერთო; მადლიერების მსხვერპლს შემოგწირავ.

¹³რადგან შენ იხსენი ჩემი სული სიკვდილისაგან, ჩემი ფეხი – წაბორძიკებისაგან, რათა ვიარო ღმერთის წინაშე სიცოცხლის შუქით.