Read სბს–2013 ფსალმუნები 56 Bible Online

ფსალმუნები 56 - სბს–2013 bible

ფსალმუნები 56

¹გუნდის ლოტბარს. ნუ მოსპობ. დავითის ძეგლისწერა, როცა საულს გაექცა მღვიმეში. შემიწყალე, ღმერთო, შემიწყალე, რადგან შენ მოგენდო ჩემი სული; შენი ფრთების ჩრდილქვეშ შევაფარებ თავს, ვიდრე გასაჭირი გადაივლიდეს.

²მოვუხმობ უზენაეს ღმერთს, ღმერთს, რომელიც თავის ნებას აღასრულებს ჩემზე.

³გამომიგზავნის ზეციდან ხსნას, შეარცხვენს ჩემი გათელვის მსურველს. გამომიგზავნის ღმერთი თავის წყალობას და ჭეშმარიტებას.

⁴ჩემი სული ლომების შუაგულშია, რომლებიც ხარბად შთანთქამენ ადამიანს, რომელთა კბილები მშვილდ-ისრებია, ენა კი ბასრი მახვილი.

⁵ამაღლდი ცათა ზემოთ, ღმერთო! მთელს დედამიწაზე იყოს შენი დიდება!

⁶ბადე გაამზადეს ჩემს ფერხთათვის; ჩემი სული მოიდრიკა; წინ ორმო გამითხარეს, მაგრამ თვით ჩაცვივდნენ შიგ.

⁷წრფელია ჩემი გული, ღმერთო, წრფელია ჩემი გული! გიმღერებ და გიგალობებ!

⁸გამოიღვიძე, დიდებავ ჩემო! გამოიღვიძე, ჩანგო და ქნარო! გამოვაღვიძებ ცისკარს!

⁹განგადიდებ ხალხებს შორის, უფალო, გიგალობებ ერებში.

¹⁰რადგან ზეცამდეა შენი წყალობა, და ღრუბლებამდე – შენი ჭეშმარიტება.

¹¹ამაღლდი ცათა ზემოთ, ღმერთო! მთელ დედამიწაზე იყოს შენი დიდება!