Read სბს–2013 ფსალმუნები 58 Bible Online

ფსალმუნები 58 - სბს–2013 bible

ფსალმუნები 58

¹გუნდის ლოტბარს. ნუ მოსპობ. დავითის ძეგლისწერა, როდესაც საულმა გაგზავნა მისი სახლის სათვალთვალოდ, რომ მოეკლათ იგი. მიხსენ მტრებისგან, ღმერთო ჩემო! დამიცავი მოდავეთაგან!

²მიხსენ სიმრუდის მოქმედთაგან, სისხლის მსმელთაგან გადამარჩინე.

³რადგანაც აჰა, უთვალთვალებენ ჩემს სულს; სასტიკი ხალხი იკრიბება ჩემს წინააღმდეგ, უფალო, თუმცა არც დანაშაული მიმიძღვის, არც შეცოდება;

⁴გამორბიან და ემზადებიან. გამოიღვიძე ჩემს საშველად და მომხედე!

⁵შენ, უფალო, ღმერთო ძალთა, ღმერთო ისრაელისა, გამოიღვიძე, რომ მოჰკითხო ყველა ერებს; არ დაინდო არც ერთი ღალატით მზრახველი უკანონობისა.

⁶ყოველ საღამოს ბრუნდებიან, ძაღლებივით ყმუიან და გარს უვლიან ქალაქს.

⁷აჰა, ანთხევენ პირით, მახვილი აქვთ ბაგეებში, აქაოდა, ვინ ისმენსო?

⁸მაგრამ შენ, უფალო, დასცინებ მათ, აბუჩად აიგდებ ყველა ერებს.

⁹ძალავ ჩემო, მე შენ მოგმართავ, რადგან შენა ხარ, ღმერთო, ჩემი სიმაგრე.

¹⁰ღმერთი, ჩემი მწყალობელი, წინ წარმიძღვება; ღმერთი მიჩვენებს მტრებზე გამარჯვებას.

¹¹ნუ დახოცავ მათ, რომ არ დაივიწყოს ჩემმა ხალხმა, გაფანტე შენი ძალით და დაამდაბლე, უფალო, ფარო ჩვენო!

¹²რადგან მათი პირის ცოდვა არის მათი სიტყვა, დაე გაებან მახეში თავიანთი ქედმაღლობით, ტყუილი ფიცისა და პირფერობისათვის,

¹³მოსპე რისხვით, მოსპე ერთიანად, ამით შეიტყონ, რომ ღმერთი ბატონობს იაკობში, ქვეყნიერების კიდით-კიდემდე.

¹⁴დაე, დაბრუნდნენ საღამოობით, ძაღლებივით იყმუვლონ და გარს შემოუარონ ქალაქს.

¹⁵დაე, იწანწალონ საჭმლისათვის და მშივრებმა ათიონ ღამე.

¹⁶მე კი შენს სიძლიერეს ვუმღერებ, დილდილობით ვიღაღადებ შენს წყალობაზე, რადგან შენ იყავი ჩემი ბურჯი და თავშესაფარი ჩემი გაჭირვების დღეს.

¹⁷სიმტკიცევ ჩემო, შენ გიგალობებ; რადგან ღმერთია ჩემი მტკიცე ბურჯი, ღმერთი, ჩემი მწყალობელი.