Read სბს–2013 ფსალმუნები 61 Bible Online

ფსალმუნები 61 - სბს–2013 bible

ფსალმუნები 61

¹მხოლოდ ღმერთს ელის მდუმარედ სული ჩემი; მისგან არის ჩემი ხსნა.გუნდის ლოტბარს. იედუთუნისთვის. ფსალმუნი დავითისა.

²მხოლოდ ის არის ჩემი კლდე და ჩემი ხსნა, ჩემი მაღალი კოშკი; არ დავეცემი.

³როდემდე დაესხმით თავს ადამიანს, შეეცდებით მის წაქცევას, როგორც დაკიდული კედლისა, მორყეული ყორისა?

⁴განიზრახეს სიმაღლიდან მისი გადმოგდება; მიმართავენ სიცრუეს; პირით აკურთხებენ, გულით კი სწყევლიან.

⁵მხოლოდ ღმერთს ელოდება ჩემი სული მდუმარედ; რადგან მისგან არის ჩემი იმედი.

⁶მხოლოდ ის არის ჩემი კლდე და ჩემი ხსნა, ჩემი სიმაგრე; არ დავეცემი.

⁷ღმერთისგან არის ჩემი ხსნა და ჩემი ღირსება; ღმერთი არის ჩემი კლდე და თავშესაფარი.

⁸მას მიენდეთ ყოველჟამს, ხალხნო, თქვენი გული გადმოღვარეთ მის წინაშე! ღმერთია ჩვენი თავშესაფარი.

⁹არარაობა არიან მდაბიონი, ცრუობენ დიდების მქონენი; სასწორზე რომ დადო, ყველა ერთად არარაობაზე ნაკლები იქნება.

¹⁰ნუ დაამყარებთ იმედს მძარცველობაზე, მტაცებლობას ნუ გამოედევნებით; თუ დოვლათი გაიზრდება, გულს ნუ მიაპყრობთ მას.

¹¹ერთხელ თქვა ღმერთმა, ორჯერ მოვისმინე, რომ ღმერთისაა ძალა.

¹²და შენი არს, უფალო, წყალობა, რადგან შენ მიუზღავ თითოეულს მისი საქმისამებრ.