Read სბს–2013 ფსალმუნები 65 Bible Online

ფსალმუნები 65 - სბს–2013 bible

ფსალმუნები 65

¹გუნდის ლოტბარს. გალობა ფსალმუნისა. შეჰღაღადე ღმერთს, მთელო ქვეყნიერებავ!

²უგალობეთ მისი სახელის ღირსებას, ხოტბა შეასხით მის დიდებას.

³უთხარით ღმერთს: რა საოცარია შენი საქმენი, შენი ძალის სიდიადეს ქვეშ ეგებიან შენი მტრები.

⁴მთელი ქვეყნიერება თაყვანს გცემს შენ; მთელი დედამიწა გადიდებს შენ; ხოტბას ასხამს შენს სახელს!

⁵მოდით, იხილეთ ღმერთის საქმენი; შემაძრწუნებელია მისი მოქმედება ადამიანის შვილებზე.

⁶ზღვა ხმელეთად აქცია; მდინარე ფეხით გადალახეს; იქ გავიხარეთ მის გამო.

⁷გაბატონებულია თავისი ძალით საუკუნოდ, მისი თვალები ჭვრეტენ ერებს, ურჩნი ნუ გაამაყდებიან!

⁸ადიდეთ, ერებო, ღმერთი ჩვენი, აღავლინეთ ხმა მისი ქებისა,

⁹ვინც შეუნარჩუნა ჩვენს სულს სიცოცხლე და ფეხი ჩვენი დაიცვა წაბორძიკებისაგან.

¹⁰რადგან შენ, ღმერთო, გამოგვცადე, გადაგვადნე, როგორც ვერცხლს ადნობენ.

¹¹მოგვაქციე ბადეში, ჩაგვრის ტვირთი აგვკიდე ზურგზე.

¹²დაგვასვი თავზე კაცი; გაგვატარე ცეცხლსა და წყალში, მაგრამ ბოლოს გაგვიხალვათე.

¹³მოვალ შენს სახლში საცეცხლო მსხვერპლით, აღგისრულებ ჩემს აღთქმებს,

¹⁴რომლებიც წარმოთქვეს ჩემმა ბაგეებმა, და ჩემმა პირმა აღგითქვა გასაჭირში.

¹⁵მსუყე სრულადდასაწველს ამოგიტან საკმევლითა და ვერძებით, შემოგწირავ ხბორებს და ვაცებს.

¹⁶მოდით, ისმინეთ ყველამ, ვისაც ღმერთის შიში გაქვთ, და გიამბობთ, რა ქმნა ჩემი სულისთვის.

¹⁷მას შევღაღადე ჩემი ბაგეებით, და ხოტბა შევასხი ჩემი ენით.

¹⁸სიმრუდე რომ შეემჩნია ჩემს გულში, არ შეისმენდა უფალი.

¹⁹მაგრამ მისმინა ღმერთმა, ყური მოაპყრო ჩემი ლოცვის ხმას.

²⁰კურთხეულ იყოს უფალი, რომელმაც არ უარყო ჩემი ლოცვა და არ მომაკლო თავისი წყალობა!