Read სბს–2013 ფსალმუნები 67 Bible Online

ფსალმუნები 67 - სბს–2013 bible

ფსალმუნები 67

¹გუნდის ლოტბარს. დავითისა. ფსალმუნი საგალობელისა. დაე აღდგეს ღმერთი, განიბნენ მისი მტრები, და მისი მოძულენი უკუიქცნენ მისგან!

²როგორც კვამლი იფანტება, ისე გაფანტე; როგორც ცვილი დნება ცეცხლზე, ისე დაიღუპონ ბოროტნი ღმერთის სახის წინაშე!

³ხოლო მართლებმა გაიხარონ, ილხინონ ღმერთის წინაშე, სიხარულით იზეიმონ!

⁴ადიდეთ ღმერთი, უგალობეთ მის სახელს! მოუმზადეთ გზა მას, ვინც უდაბნოებს სერავს; უფალია მისი სახელი; ილხინეთ მის წინაშე!

⁵მამა ობოლთა და მსაჯული ქვრივთა არის ღმერთი თავის წმიდათა წმიდაში;

⁶ღმერთი ბინას აძლევს ეულებს, გამოჰყავს ტყვეები საპყრობილედან, ხოლო ურჩნი ხრიოკზე რჩებიან.

⁷ღმერთო, როცა შენი ხალხის წინაშე გამოხვედი, როცა ფეხი დადგი უდაბნოში,

⁸დედამიწა იძრა, ცანიც კი წვეთავდნენ ღმერთის სახის წინაშე; ეს სინაიც ირყეოდა წინაშე ღმერთისა, ისრაელის ღმერთისა.

⁹ბარაქიან წვიმას აწვიმებდი, ღმერთო, შენს სამკვიდროს, და როდესაც უძლურდებოდა, შენ ამაგრებდი.

¹⁰შენმა სამწყსომ იქ ჰპოვა ბინა; შენი სიკეთით განუმზადე ღარიბს, ო ღმერთო.

¹¹უფალი იძლევა სიტყვას, დიდია ამ სიტყვის მახარობელთა გუნდი:

¹²„ჯარების მეფენი გარბიან, გარბიან! შინ მყოფი ქალები კი ნადავლს იყოფენ.“

¹³მაშინაც კი, როდესაც ცხვრის ბაკებში წევხართ – მტრედის ფრთები ვერცხლით არის დაფარული და მისი ნაკრტენი მოოქროვილია.

¹⁴როცა ყოვლადძლიერმა გაფანტა იქ მეფეები, დაითოვლა ცალმონი.

¹⁵ბაშანის მთაო, მთაო ღმერთისა, მწვერვალმრავალო მთაო, მთაო ბაშანისა!

¹⁶რატომ შეჰყურებთ შურით, მწვერვალებით მდიდარო მთებო, მთას, რომელიც ღმერთმა ისურვა სამოსახლოდ, რომელსაც უფალი დაიმკვიდრებს სამუდამოდ?

¹⁷ღმერთის ეტლები უთვალავია, ათასეულები; მათ შორის არის უფალი სინაიზე, წმიდა ადგილას.

¹⁸შენ ახვედი მაღლა, დაატყვევე ტყვეობა, მიიღე ძღვენი კაცთა შორს, რათა ურჩებთანაც დაისადგუროს უფალმა ღმერთმა.

¹⁹კურთხეულ არს უფალი, რომელიც ყოველ დღე ზრუნავს ჩვენზე, ღმერთი, ჩვენი მხსნელი.

²⁰ჩვენი ღმერთი არის ღმერთი დამხმარე, და უფალი ღმერთის ხელში არის ხსნა სიკვდილისაგან.

²¹მაგრამ ღმერთი თავს გაუჭეჭყავს მტრებს, აჯაგრულ კეფას – დანაშაულის გზით მოსიარულეს.

²²თქვა უფალმა: ბაშანიდან დავაბრუნებ მათ; დავაბრუნებ ზღვის სიღრმეებიდან,

²³რათა ჩადგათ თქვენი ფეხები მტრების სისხლში, და თქვენმა ძაღლებმა ჩაყონ შიგ ენა;

²⁴ნახეს შენი შესვლა, ღმერთო, შესვლა ჩემი ღმერთისა, ჩემი მეფისა, წმიდაში.

²⁵წინ მგალობლები, უკან – მემუსიკენი, შუაში – მედაირე ქალწულები.

²⁶კრებულთა შორის ადიდეთ ღმერთი, უფალი, წყარო ისრაელისა!

²⁷იქ ბენიამინი – უმრწემესი – წინ მიუძღვით; იუდას მთავრები გუნდად, ზებულუნის მთავრები, ნაფთალის მთავრები.

²⁸შენმა ღმერთმა მოგაკუთვნა ძალა, ღმერთო, განამტკიცე ის, რაც მოიმოქმედე ჩვენთვის.

²⁹შენი ტაძრის გამო, რომელიც იერუსალიმშია, ძღვენს მოგართმევენ მეფენი.

³⁰შერისხე მხეცი ლერწმიანისა, ხარების ჯოგი ხბორებით, ხალხი, რომელიც იქადის ვერცხლის ზოდებით. მიმოფანტე ომის მოყვარული ხალხები.

³¹ბრინჯაოს მოიტანენ ეგვიპტიდან, ქუში გაიწოდებს ხელს ღმერთისაკენ.

³²უმღერეთ ღმერთს ქვეყნიერების სამეფონო, უგალობეთ დიდება უფალს,

³³ამაღლებულს ძველთუძველეს ცათა ცაში! აჰა, ის გამოსცემს თავისი ძლიერების ხმას.

³⁴მიანიჭეთ სიძლიერე ღმერთს! მისი სიდიადე ისრაელზეა და მისი სიძლიერე – ღრუბლებში.

³⁵საოცარი ხარ, ღმერთო, შენს ტაძარში. ღმერთი ისრაელისა – ის აძლევს ძალასა და სიმაგრეს თავის ხალხს; კურთხეულ არს ღმერთი!