Read სბს–2013 ფსალმუნები 68 Bible Online

ფსალმუნები 68 - სბს–2013 bible

ფსალმუნები 68

¹გუნდის ლოტბარს. შოშანისებურად. დავითისა. მიხსენი, ღმერთო! რადგან ყელამდე მომადგა წყალი.

²ჩავიძირე გაუვალ ლაფში, არ არსებობს ფეხის დასადგამი; შევედი წყლის სიღრმეში და სწრაფმა დინებამ წამიღო.

³მოვიქანცე ღაღადით, ყელი გამიშრა, თვალები ამომიღამდა ჩემი ღმერთის მოლოდინში.

⁴უმიზეზოდ მოძულე მეტი მყავს, ვიდრე თმა თავზე. გაძლიერდნენ ჩემი მოსპობის მსურველნი, ჩემზე ტყუილ-უბრალოდ გადამტერებულნი; რაც არ წამირთმევია, უნდა დავაბრუნო.

⁵ღმერთო, შენ უწყი ჩემი უგუნურება; ჩემი დანაშაული დაფარული არ არის შენგან.

⁶ნუ შერცხვებიან ჩემს გამო შენი მოიმედენი, ღმერთო, უფალო, ღმერთო ძალთაო; ნუ გაწბილდებიან ჩემს გამო შენი მაძიებელნი, ღმერთო ისრაელისა.

⁷რადგანაც შენთვის მივიღე ლანძღვა, სირცხვილმა დაფარა ჩემი სახე.

⁸შორეული გავხდი ჩემი ძმებისათვის, უცხო – დედაჩემის შვილთათვის.

⁹რადგან შენი სახლის შურმა შემჭამა მე და შენთა მლანძღველთა ლანძღვა დამატყდა თავს.

¹⁰როდესაც ვტიროდი ჩემი სულის მარხვით, მათი სალანძღავი გავხდი;

¹¹როცა ჩავიცვი სამოსად ძაძა, იგავად ვიქეცი მათთვის.

¹²ჩემზე ლაპარაკობენ კარიბჭესთან მსხდომნი, და ჩემზე მღერიან ღვინის მსმელები.

¹³მე კი შენს მიმართ ვლოცულობ, უფალო, სასურველ დროს; ღმერთო, შენი დიდი წყალობით მიპასუხე.

¹⁴მიხსენ ჭაობისაგან, რომ არ დავინთქა; გადამარჩინე მოძულეთაგან და წყლის სიღრმეთაგან.

¹⁵ნუ გამიტაცებს წყლის ტალღა, ნუ ჩამყლაპავს მორევი, ნუ შეიკრავს ჩემზე პირს ჭა.

¹⁶მიპასუხე, უფალო, რადგან კეთილია შენი წყალობა; შენი დიდი სიბრალულით გადმომხედე.

¹⁷ნუ დაფარავ სახეს შენი მორჩილისგან, რადგან მიჭირს; მსწრაფლ მიპასუხე.

¹⁸მოუახლოვდი ჩემს სულს, გამომიხსენი; გამომისყიდე ჩემი მტრების გამო!

¹⁹შენ იცი ჩემი ლანძღვა, გაწბილება და შერცხვენა ჩემი; შენს თვალწინ არიან ჩემი მტრები.

²⁰დამცირებამ დაამსხვრია ჩემი გული, ქანცი გამიწყდა; ველოდი თანამგრძნობს და არავინ იყო, მანუგეშებელს, – და ვერ ვპოვე.

²¹შეურიეს ჩემს საჭმელში ნაღველი, წყურვილის დროს ძმარი შემასვეს.

²²იყოს მათი ტაბლა მათთვის ხაფანგი და მშვიდად მყოფთათვის – მახე.

²³დაუბნელდეთ მათ თვალები და წელი მათი სამუდამოდ მოადუნე.

²⁴გადმოაფრქვიე მათზე შენი მრისხანება, და შენი რისხვის ალი ეწიოთ მათ.

²⁵სამკვიდრებელი მათი გაპარტახდეს, მათ კარვებში არ იყოს მკვიდრი!

²⁶ვინაიდან, ვინც შენ გვემე, დევნიან, და შენგან დაჭრილის სატკივარს ამრავლებენ.

²⁷დაურთე მათ სასჯელი სასჯელზე; ნუმც შეაღწევენ შენს სიმართლეში.

²⁸ამოიშალონ ცოცხალთა წიგნიდან, მართლებთან ნუ ჩაიწერებიან.

²⁹ხოლო მე ღატაკი და დავრდომილი ვარ; შენმა შველამ, ღმერთო, ამამაღლოს მე!

³⁰შევაქებ ღმერთის სახელს გალობით, განვადიდებ მადლიერებით.

³¹ეს უფრო სათნო იქნება უფლისთვის, ვიდრე ხარი ან ხბო რქიანი და ჩლიქიანი.

³²ნახონ მოკრძალებულებმა და გაიხარონ, გაცოცხლდეს გული თქვენი, მაძიებელნო ღმრთისა.

³³რადგან უსმენს ღატაკს უფალი და არ უგულებელყოფს თავისიანებს ტყვეობაში.

³⁴განადიდოს იგი ცამ და დედამიწამ, ზღვებმა და ყოველმა, რაც მათში მოძრაობს.

³⁵რადგან იხსნის ღმერთი სიონს და აღადგენს იუდას ქალაქებს, იქ დასახლდებიან და დამკვიდრდებიან მისი მსახურნი.

³⁶მის მორჩილთა შთამომავლობა დაეუფლება მას, და მისი სახელის მოყვარულნი იცხოვრებენ მასში.