Read სბს–2013 ფსალმუნები 70 Bible Online

ფსალმუნები 70 - სბს–2013 bible

ფსალმუნები 70

¹მე შენ გესავ, უფალო, ნუ შევრცხვები უკუნისამდე!

²შენი სიმართლით მიხსენ და გადამარჩინე, ყური მომაპყარ და მიშველე!

³იყავ ჩემთვის კლდოვანი თავშესაფარი, ჩემი ხსნის ბურჯი, რადგან შენა ხარ ჩემი კლდე და სიმაგრე ჩემი.

⁴ღმერთო ჩემო, მიხსენ ბოროტის ხელისაგან, უკანონობის მოქმედის და მძარცველის ხელისგან.

⁵რადგან შენა ხარ ჩემი იმედი, უფალო, ღმერთო ჩემო, ჩემი სასოება ყრმობიდანვე.

⁶შენზე ვიყავი დაყრდნობილი დედის მუცლიდან, შენ გამომიყვანე დედის წიაღიდან; შენ გეკუთვნის ჩემი ხოტბა მუდამ.

⁷საოცრებასავით ვარ მრავალთათვის; მაგრამ შენ ხარ ჩემი მტკიცე თავშესაფარი.

⁸სავსეა ჩემი პირი შენი ქებით, და შენი დიდებით ყოველ ჟამს.

⁹ნუ უკუმაგდებ სიბერის დროს, უძლურებისას ნუ მიმატოვებ.

¹⁰რადგან მოითათბირეს ჩემმა მტრებმა ჩემზე და ერთად იზრახავენ ჩემი სულის წინააღმდეგ ჩასაფრებულნი.

¹¹ამბობენ: ღმერთმა მიატოვა იგი; დაედევნეთ და შეიპყარით, რაკი არა ჰყავს მხსნელი.

¹²ღმერთო, ნუ გამშორდები; ღმერთო ჩემო, ჩემს შესაწევად გამოეშურე.

¹³დაე, შერცხვნენ და მოისპონ ჩემი სულის მაშფოთებელნი; სირცხვილმა და გაწბილებამ დაბუროს ჩემთვის სიავის მაძიებელნი.

¹⁴ხოლო მე მსურს მარად მოველოდე და ვამრავლებდე შენს დიდებას.

¹⁵ჩემი ბაგენი შენს სიმართლეზე ილაპარაკებენ ყოველდღე, შენმიერ შველაზე, რომელთა რიცხვიც არ ვიცი.

¹⁶შევალ განსჯაში უფლის ძლიერებაზე, გავიხსენებ შენს სიმართლეს, მხოლოდ შენსას.

¹⁷ღმერთო, შენ მმოძღვრავდი ყრმობიდანვე და დღემდე ვაუწყებ შენს საოცრებებს.

¹⁸მოხუცებულობამდე და ღრმა სიბერემდეც ნუ მიმატოვებ, ღმერთო, ვიდრე გავაცნობდე შენს მკლავს და შენს სიძლიერეს ყველა მომავალ თაობას.

¹⁹შენი ძალა და შენი სიმართლე, ღმერთო, ზეცამდეა, შენ ჰქმენ დიადი საქმენი; ღმერთო, ვინ არის შენი ბადალი?

²⁰შენ მაჩვენე მრავალი და მძიმე გაჭირვება; კვლავ გამაცოცხლებ, დედამიწის უფსკრულიდან კვლავ ამომიყვან.

²¹შენ გაამრავლებ ჩემს დიდებას და მობრუნდები ჩემს სანუგეშებლად.

²²და მეც მადლობას შემოგწირავ ებნის საკრავით, ვადიდებ შენს ჭეშმარიტებას, ღმერთო, გიგალობებ ქნარით, წმიდაო ისრაელისა.

²³იხარებენ ჩემი ბაგენი, როს გიგალობებ შენ, და ჩემი სულიც, შენ რომ იხსენი.

²⁴ჩემი ენაც ყოველდღე წარმოსთქვამს შენს სიმართლეს; რადგან შერცხვნენ და დამცირდნენ ჩემი ავის მაძიებელნი.