Read სბს–2013 ფსალმუნები 71 Bible Online

ფსალმუნები 71 - სბს–2013 bible

ფსალმუნები 71

¹სოლომონისთვის. ღმერთო, მიეც შენი სამართალი მეფეს, და შენი სიმართლე – მეფის ძეს.

²რათა სიმართლით გასაჯოს შენი ხალხი, და შენი ღატაკნი – სამართლიანად!

³მთები მშვიდობას მოუტანენ ხალხს, და ბორცვები – სამართლიანობას.

⁴გაასამართლებს ის ხალხის ღატაკთ, იხსნის შვილს ღარიბისას და დაჩაგრავს მჩაგვრელს.

⁵შენი შიში ჰქონდეთ, ვიდრე მზე და მთვარეა, თაობიდან თაობამდე!

⁶ემსგავსოს ის წვიმას, რომელიც მოდის მოთიბულ ბალახზე, წვეთებს, მიწას რომ ალბობენ.

⁷გაიფურჩქნოს მის დღეებში სიწმინდე, გამრავლდეს მშვიდობა, ვიდრე მთვარე არსებობს!

⁸იბატონოს მან ზღვიდან ზღვამდე და მდინარიდან დედამიწის კიდეებამდე!

⁹ქედი მოიდრიკონ მის წინაშე უდაბნოს მცხოვრებლებმა, და მისმა მტრებმა მტვერი ალოკონ!

¹⁰თარშიშისა და კუნძულთა მეფეებმა ხარკი მოუტანონ მას, შებასა და სებას მეფეებმა ძღვენი მოართვან!

¹¹ყველა მეფემ თაყვანი სცეს მას, და ყველა წარმართი დაემორჩილოს.

¹²რადგანაც იგი იხსნის ღარიბს, როდესაც შეჰღაღადებს, და ღატაკს, რომელსაც არა ჰყავს შემწე.

¹³შეიწყნარებს დავრდომილსა და ღარიბს, და ღარიბთა სიცოცხლეს დაიხსნის.

¹⁴იხსნის მათ სიცოცხლეს ვერაგობისა და ძალადობისგან, ძვირფასი იქნება მათი სისხლი მის თვალში.

¹⁵დღეგრძელი იყოს! მიართვან მას შებას ოქრო. დღენიადაგ ილოცონ მისთვის, ყოველდღე აკურთხონ ის!

¹⁶იყოს სიუხვე პურისა დედამიწაზე, ამაღლდეს თავთავი მთის წვერებამდე, ლიბანივით ამაღლდეს ნაყოფი მისი; აყვავდნენ კაცნი ქალაქებში, როგორც ბალახი დედამიწაზე!

¹⁷იყოს მისი სახელი უკუნისამდე; ვიდრე მზე არსებობს, იდიდოს მისი სახელი! იკურთხოს მასში ქვეყნიერების ყოველი ტომი, ყოველმა ერმა კურთხეული უწოდოს მას!

¹⁸კურთხეულ იყოს უფალი, ღმერთი ისრაელისა, მხოლოდ ის იქმს სასწაულებს!

¹⁹კურთხეულ იყოს სახელი მისი დიდებისა უკუნისამდე, აივსოს მისი დიდებით ქვეყნიერება! ამინ, ამინ!

²⁰დამთავრდა ლოცვები დავითისა, იესეს ძისა.