Read სბს–2013 ფსალმუნები 73 Bible Online

ფსალმუნები 73 - სბს–2013 bible

ფსალმუნები 73

¹მოძღვრება. ასაფისა. ღმერთო, რატომ მიგვატოვე სამუდამოდ, რატომ აინთო შენი რისხვა შენი სამწყსოს ცხვარზე?

²გაიხსენე შენი თემი, ადრევე რომ შეიძინე, ტომი, რომელიც იხსენი შენს სამკვიდროდ! გაიხსენე მთა სიონისა, რომელზედაც შენი სავანეა.

³წარმართე შენი ნაბიჯები მარადიული ნანგრევებისაკენ; ყველაფერი მოსპო მტერმა ტაძარში!

⁴შენი მოდავენი ღმუიან შენს წმიდა ადგილას; დადეს თავიანთი ნიშნები სასწაულების მაგიერ.

⁵ცულები ჩაასვეს ხის ჩარჩოებს,

⁶და ახლა ამსხვრევენ მის ჩუქურთმებს ერთიანად უროთი და ცულით.

⁷ცეცხლს მისცეს შენი ტაძარი, მიწასთან გაასწორეს შენი სახელის სამკვიდრებელი.

⁸თქვეს თავიანთ გულში: გავანადგურებთ მათ ერთიანად. დაწვეს ღმერთის ყველა საკრებულო ქვეყანაზე.

⁹ჩვენს სასწაულებს ვეღარ ვხედავთ, აღარა გვყავს წინასწარმეტყველი, არავინ არის ჩვენს შორის მცოდნე იმისა, თუ როდემდე გაგრძელდება ასე.

¹⁰ღმერთო, როდემდე უნდა დაგვცინოს მტერმა? ნუთუ სამარადჟამოდ დაგმობს მოშუღარი შენს სახელს?

¹¹რატომ სწევ ხელს უკან და ფარავ შენს მარჯვენას? გამოიღე უბიდან და მოსპე!

¹²მაგრამ ღმერთი ჩემი მეფეა ძველთაგანვე, შველისა და ხსნის მოქმედი ქვეყნიერებაზე.

¹³შენ გაკვეთე ზღვა შენი ძალით, მიუმტვრიე თავები წყლის ურჩხულებს;

¹⁴შენ გაუჭეჭყე თავი ლევიათანს, მიეცი საჭმელად უდაბნოს მხეცებს.

¹⁵შენ გააპე წყარო და ხევი, შენ დააშრე ძლიერი მდინარენი.

¹⁶შენია დღე, ღამეც შენია; შენ დაადგინე მთვარე და მზე.

¹⁷შენ დასდე ქვეყნიერების ყველა საზღვარი, ზაფხულ-ზამთარი შენ დაადგინე.

¹⁸უფალო, გაიხსენე ეს: როგორ გაგინებს შენ მტერი, და არამზადა ხალხი როგორ ლანძღავს შენს სახელს.

¹⁹მხეცებს ნუ მისცემ შენი გვრიტის სულს, შენი ღარიბების სიცოცხლეს ნუ დაივიწყებ.

²⁰გაიხსენე შენი აღთქმა; რადგან აივსო ქვეყნიერების ბნელი ადგილები ძალადობის სადგომებით.

²¹ნუ დაბრუნდება ჩაგრული გაწბილებული, დაე ღარიბ-ღატაკნი აქებდნენ შენს სახელს!

²²აღდეგ, ღმერთო, ედავე შენს მოდავეებს, გაიხსენე ყოველდღიური შენი ლანძღვა არამზადებისაგან!

²³ნუ დაივიწყებ შენს მოდავეთა ხმას; შენი მტრის ღრიალს, მუდამ რომ ამოდის!