Read სბს–2013 ფსალმუნები 76 Bible Online

ფსალმუნები 76 - სბს–2013 bible

ფსალმუნები 76

¹გუნდის ლოტბარს. იედუთუნისთვის. ასაფის ფსალმუნი. ჩემი ხმა ღმერთის მიმართაა და მე შევღაღადებ მას; ჩემი ხმა ღმერთის მიმართაა და ის მომისმენს.

²ჩემი გაჭირვების დღეს უფალს ვეძიებ; ღამღამობით გაწვდილია ჩემი ხელი და არ ივანებს, უარყოფს ნუგეშს სული ჩემი.

³ვიხსენებ ღმერთს და ვკვნესი, ვფიქრობ, და უძლურდება სული ჩემი.

⁴თვალიც არ მომახუჭინე, შევძრწუნდი და ხმას ვეღარ ვიღებ.

⁵ვიგონებ ადრინდელ დღეებს, გარდასულ წლებს;

⁶ვიხსენებ ჩემს გალობას ღამღამობით, ჩემს გულს ვესაუბრები, სული ჩემი ეძიებს პასუხს:

⁷ნუთუ საუკუნოდ მიმატოვებს უფალი და აღარასოდეს მომისურვებს?

⁸ნუთუ სამუდამოდ გაქრა მისი წყალობა, სამარადჟამოდ დასრულდა მისი აღთქმანი?

⁹სამუდამოდ დაივიწყა შეწყალება ღმერთმა? უარყო რისხვით სიბრალული?

¹⁰და ვთქვი: ჩემი უბედურება უზენაესის მარჯვენის შეცვლაა.

¹¹გავიხსენებ უფლის საქმეებს, ჭეშმარიტად გავიხსენებ შენს ძველ სასწაულებს.

¹²ჩავუკვირდები ყველა შენს საქმეს, დავფიქრდები შენს ნამოქმედარზე.

¹³ღმერთო, წმიდაა შენი გზა! რომელი ღმერთია შენსავით დიდი?

¹⁴შენა ხარ ღმერთი, სასწაულთმოქმედი; შენ გამოავლინე ერებზე ძლიერება შენი.

¹⁵შენი მკლავით გამოიხსენი შენი ერი – იაკობისა და იოსების ძენი.

¹⁶როდესაც გიხილეს წყლებმა, ღმერთო, როდესაც გიხილეს წყლებმა, შეძრწუნდნენ, ზღვათა უფსკრულებიც კი შეიძრნენ.

¹⁷გადმოღვარეს წყლები ღრუბლებმა, დაიქუხეს ცათა, შენმა ისრებმა იელვეს.

¹⁸შენი გრგვინივის ხმამ დაიგრგვინა ცის თაღზე – გაანათეს ელვებმა სამყარო, შეძრწუნდა და შეირყა დედამიწა.

¹⁹ზღვაში გაიარა შენმა გზამ და შენმა ბილიკმა – დიდ მდინარეებში, და მაინც შენი კვალი უცნობი დარჩა.

²⁰ფარასავით მიუძღოდი შენ შენს ხალხს მოსესა და აარონის ხელით.