Read სბს–2013 ფსალმუნები 78 Bible Online

ფსალმუნები 78 - სბს–2013 bible

ფსალმუნები 78

¹ფსალმუნი ასაფისა. ღმერთო, ერები მოვიდნენ შენს სამკვიდრებელში; შებილწეს შენი წმიდა ტაძარი, იერუსალიმი ნანგრევებად აქციეს.

²მისცეს შენს მსახურთა გვამები ცის ფრინველებს საჯიჯგნად, შენთა წმიდათა სხეულები – მიწის ნადირებს.

³წყალივით დაღვარეს მათი სისხლი იერუსალიმის გარშემო, და დამმარხავი არავინაა.

⁴სალანძღავი გავხდით ჩვენი მეზობლებისთვის, მასხარად ასაგდები და დასაცინი – ჩვენს ირგვლივ მყოფთათვის.

⁵როდემდე უფალო? ნუთუ შენი რისხვა სამუდამოა? სამუდამოდ იგიზგიზებს შური შენი, ვითარცა ცეცხლი?

⁶გადმოღვარე შენი რისხვა ერებზე, რომლებიც არ გიცნობენ, და სამეფოებზე, შენს სახელს რომ არ მოუხმობენ!

⁷რადგან შეჭამეს იაკობი და მისი სადგომი გააპარტახეს.

⁸ნუ გაგვიხსენებ წინაპართა ცოდვებს; მალე შეგვეგებოს შენი წყალობა, რადგან მეტისმეტად დავძაბუნდით.

⁹გვიშველე, ღმერთო, ჩვენო მხსნელო, შენი სახელის ღირსებისათვის გადაგვარჩინე, შეგვინდე ცოდვები შენი სახელის გულისათვის!

¹⁰რატომ უნდა თქვან ერებმა: სად არის მათი ღმერთი? დაე ჩვენს თვალწინ ცნობილი გახდეს ერებს შორის შენს მსახურთა დათხეული სისხლის შურისძიება!

¹¹მოაღწიოს შენამდე ტუსაღის კვნესამ, შენი მკლავის სიძლიერით შეეწიე სიკვდილის შვილებს!

¹²დაუბრუნე ჩვენს მეზობლებს შვიდმაგად მათ წიაღში ის დამცირება, შენ რომ გამცირებდნენ, უფალო!

¹³ხოლო ჩვენ – შენი ხალხი და შენი სამწყსოს ცხვარი – მადლობას შემოგწირავთ მარადჟამს; თაობიდან თაობებს მოვუთხრობთ შენს დიდებას.