Read სბს–2013 ფსალმუნები 79 Bible Online

ფსალმუნები 79 - სბს–2013 bible

ფსალმუნები 79

¹გუნდის ლოტბარს. შოშანისებურად. ასაფისა. ფსალმუნი. ყური მომაპყარ, მწყემსო ისრაელისა, წინ რომ უძღოდი იოსებს, ვითარცა ცხვარს! ქერუბიმებზე ამხედრებულო, გამოგვეცხადე.

²ეფრემის, ბენიამინისა და მანაშეს წინაშე აღაგზნე შენი ძალა და გამოეშურე ჩვენს სახსნელად!

³ღმერთო! მოგვაქციე ჩვენ; დაე გაბრწყინდეს სახე შენი და დავიხსნებით!

⁴უფალო, ღმერთო ძალთაო, როდემდე იქნები განრისხებული შენი ხალხის ლოცვის მიმართ?

⁵გამოკვებე ისინი ცრემლიანი პურით და შეასვი თასი, ცრემლებით სავსე.

⁶დაგვსვი გასაკიცხად ჩვენს მეზობლებში, და ჩვენი მტრები აბუჩად გვიგდებენ.

⁷ღმერთო ძალთაო, მოგვაქციე ჩვენ, დაე გაბრწყინდეს სახე შენი და დავიხსნებით!

⁸ეგვიპტიდან გადმოიტანე ვაზი, განდევნე ერები და დანერგე ის;

⁹გაწმინდე ადგილი მის წინ, გაადგმევინე ფესვები და აავსო ქვეყანა.

¹⁰მთები დაფარა მისმა ჩრდილმა და მისმა რქებმა – მაღალი კედრები;

¹¹რქები გაიტანა ზღვამდე და მდინარემდე – ტოტები თვისი.

¹²რატომ დაანგრიე ზღუდენი მისნი, ისე რომ ყოველი გამვლელი ძარცვავს მას?

¹³ანადგურებს მას ტყიური ტახი და ველის ნადირნი კორტნიან მას.

¹⁴შემობრუნდი, ღმერთო ძალთაო! გადმოგვხედე ზეციდან და იხილე, და მოხედე ამ ვაზს.

¹⁵გაამაგრე ის, რაც დანერგა შენმა მარჯვენამ, ყლორტი, შენთვის რომ გააძლიერე!

¹⁶დაწვეს ცეცხლით, აკაფეს; შენი სახის რისხვით იღუპებიან.

¹⁷იყოს შენი ხელი შენი მარჯვენის კაცზე, ადამის ძეზე, შენთვის რომ გააძლიერე!

¹⁸ჩვენ კი არასდროს არ უკუვდგებით შენგან, გვაცოცხლე და შენს სახელს მოვუხმობთ!

¹⁹უფალო, ღმერთო ძალთაო, მოგვაქციე ჩვენ, დაე გაბრწყინდეს სახე შენი და დავიხსნებით!