Read სბს–2013 ფსალმუნები 80 Bible Online

ფსალმუნები 80 - სბს–2013 bible

ფსალმუნები 80

¹გუნდის ლოტბარს, გითითის ხმაზე. ასაფისა. უგალობეთ ღმერთს, სიმაგრეს ჩვენსას; სიხარულით შეჰღაღადეთ იაკობის ღმერთს!

²აამაღლეთ სიმღერა, დაუკარით დაირა, ტკბილხმიანი ქნარი ებანთან ერთად.

³ჩაჰბერეთ ბუკს ახალმთვარეობისას, სავსე მთვარეზე, ჩვენს დღესასწაულზე.

⁴რადგან ეს არის კვალი ისრაელისა, წესდება იაკობის ღმერთისა.

⁵ეს დაადგინა მან მოწმობად იოსებისთვის, რაჟამს გამოვიდა ეგვიპტის ქვეყნიდან;

⁶ენა, რომელიც არ იცოდა, ისმინა: „მოვხსენი ტვირთი მხრებიდან, ხელები გავუთავისუფლე გოდრისაგან.

⁷გაჭირვებაში მომიხმე და გიხსენი, გიპასუხე ქუხილის იდუმალი საუფლოდან, გამოგცადე მერიბას წყლებზე.

⁸ისმინე, ჩემო ხალხო, და გიმოწმებ! ისრაელო, თუ მომისმენ მე!

⁹არ იყოს შენში სხვა ღმერთი, თაყვანი არ სცე უცხო ღმერთს.

¹⁰მე ვარ უფალი, ღმერთი შენი, შენი გამომყვანი ეგვიპტის ქვეყნიდან; განავრცე პირი შენი და მე აღვავსებ მას.

¹¹მაგრამ არ ისმინა ჩემმა ხალხმა ჩემი ხმა, და ისრაელი არ დამემორჩილა.

¹²მაშინ მივუშვი ისინი თავიანთ გულისწადილზე, დაე იარონ თავიანთ ნებაზე.

¹³ჩემს ხალხს რომ ესმინა ჩემი და ისრაელს ჩემს გზაზე ევლო,

¹⁴მალე მოვდრეკდი მათს მტრებს და მათს მჩაგვრელებზე ხელს აღვმართავდი.

¹⁵უფლის მოძულენი ლიქნას დაუწყებდნენ და მათი ჟამი იქნებოდა სამარადისო.

¹⁶ნოყიერი ხორბლით გამოვკვებავდი და კლდის თაფლით გავაძღობდი.“