Read სბს–2013 ფსალმუნები 82 Bible Online

ფსალმუნები 82 - სბს–2013 bible

ფსალმუნები 82

¹გალობა. ფსალმუნი ასაფისა. ღმერთო, ნუ დადუმდები, ყურს ნუ დაიხშავ და ნუ დამშვიდდები!

²რადგან აჰა, შენი მტრები ღრიალებენ, და შენმა მოძულეებმა თავი წამოყვეს.

³შენი ხალხის წინააღმდეგ საიდუმლოდ მზაკვრობენ და თათბირობენ მათ წინააღმდეგ, შენ რომ იფარავ.

⁴თქვეს: მოდით, ამოვძირკვოთ ისინი, როგორც ერი და აღარ იხსენიებოდეს სახელი ისრაელისა!

⁵მოითათბირეს ერთსულოვნად, შენს წინააღმდეგ შეკრეს პირობა;

⁶ედომის ბანაკებმა და ისმაელიანებმა, მოაბმა და აგარის ნაშიერმა;

⁷გებალმა, ყამონმა და ყამალეკმა, ფილისტიმელებმა ცორელებთან ერთად.

⁸აშურიც მათ დაუკავშირდა, და შეიქნენ მკლავნი ლოტის ძეთათვის.

⁹ჰქმენ ისინი, როგორც მიდიანი, როგორც სისერა, როგორც იაბინი კიშონის ხევზე;

¹⁰რომლებიც განადგურდნენ ყენ-დორში, გადაიქცნენ მინდვრის სასუქად.

¹¹დამართე მათ დიდებულებს იგივე, რაც ყორებს და ზეებს, რაც ზებახს და ცალმუნაყს, და ყველა მათ მთავარს,

¹²რომელნიც ამბობდნენ: დავიმკვიდროთ ჩვენთვის სამკვიდრებელი ღვთისა.

¹³ღმერთო ჩემო, ჰყავ ისინი ვითარცა ბზე, ვითარცა ნამჯა ქარში;

¹⁴როგორც ცეცხლი წვავს ტყეს, და ალი ბუგავს მთებს,

¹⁵ისე დაედევნე მათ შენი რისხვით, და შენი ქარიშხლით შეაძრწუნე ისინი!

¹⁶აავსე მათი პირი სირცხვილით, რათა ეძიონ შენი სახელი, უფალო.

¹⁷შერცხვნენ და შეძრწუნდნენ სამუდამოდ, შერცხვენილნი დაიღუპონ.

¹⁸მიხვდნენ, რომ შენი სახელია უფალი, და მხოლოდ შენა ხარ უზენაესი მთელ ქვეყანაზე.