Read სბს–2013 ფსალმუნები 83 Bible Online

ფსალმუნები 83 - სბს–2013 bible

ფსალმუნები 83

¹გუნდის ლოტბარს. გითითის ხმაზე. კორახის ძეთა. ფსალმუნი. რაოდენ სასურველია შენი სადგომები, უფალო ძალთა!

²ნატრობს და ელტვის ჩემი სული უფლის ეზოებს; გული ჩემი და სხეული ჩემი უმღერიან ცოცხალ ღმერთს.

³ჩიტიც კი პოულობს ბინას და მერცხალი ბუდეს, რომ ჩასხას თავისი ბარტყები შენს საკურთხევლებთან, უფალო ძალთა, მეუფევ ჩემო და ღმერთო ჩემო!

⁴კურთხეულ არიან შენს სახლში მკვიდრნი, მარადჟამს შენი მადიდებელნი იქნებიან ისინი!

⁵ნეტარ არიან კაცნი, რომელთა ძლიერებაც შენშია, რომელთა გულშიც სიონისკენ აღმავალი გზაა.

⁶ხრიოკ ველზე გავლისას მას წყაროდ გადააქცევენ, კურთხევით დაფარავს მათ ადრეული წვიმა.

⁷ძლიერებიდან ძლიერებისკენ ივლიან, ღმერთის წინაშე გამოცხადდებიან სიონში.

⁸უფალო, ღმერთო ძალთაო, ისმინე ჩემი ლოცვა, ყური მომაპყარ, ღმერთო იაკობისა!

⁹იხილე ჩვენი ფარი, იხილე, ღმერთო, მოხედე შენი ცხებულის სახეს!

¹⁰რადგან ერთი დღე შენს ეზოებში სჯობს სხვაგან ათასს; ჩემი ღმერთის სახლის ზღურბლთან დგომას ვარჩევ ბოროტთა კარვებში ბინადრობას.

¹¹რადგან მზე და ფარია უფალი ღმერთი. მადლისა და ღირსების მომნიჭებელია უფალი, სიკეთეს არ მოაკლებს უბიწოდ მოარულთ.

¹²უფალო ძალთა! კურთხეულია კაცი, შენზე მონდობილი!