Read სბს–2013 ფსალმუნები 84 Bible Online

ფსალმუნები 84 - სბს–2013 bible

ფსალმუნები 84

¹გუნდის ლოტბარს. კორახის ძეთა. ფსალმუნი. უფალო, შენ მოწყალე იყავი შენი ქვეყნისათვის, შენ აღადგინე კეთილდღეობა იაკობისა,

²მიუტევე ურჯულოება შენს ხალხს, დაფარე ყველა მისი ცოდვა.

³შენ აგვარიდე შენი გულისწყრომა, დააცხრე შენი მრისხანება.

⁴მოგვაქციე ჩვენ, ჩვენი ხსნის ღმერთო, და წარხოცე შენი რისხვა ჩვენზე!

⁵ნუთუ სამუდამოა შენი მრისხანება, თაობიდან თაობამდე გააგრძელებ შენს რისხვას ჩვენზე?

⁶ნუთუ აღარ დაგვიბრუნებ სიცოცხლეს, რათა შენმა ხალხმა იხაროს შენით?

⁷გვიჩვენე, უფალო, წყალობა შენი და გვიბოძე შემწეობა შენი.

⁸მე კი შევისმენ, რას იტყვის უფალი ღმერთი; რადგან მშვიდობას ეტყვის ის თავის ხალხს, თავის წმიდებს, და ისინი აღარ დაუბრუნდებიან უგუნურებას.

⁹მართლაც ახლოა ხსნა მისმიერი მის მოშიშთათვის, რათა დიდებამ დაისადგუროს ჩვენს ქვეყანაში.

¹⁰წყალობა და ჭეშმარიტება შეხვდებიან ერთმანეთს, სიმართლე და მშვიდობა ეამბორებიან ერთიმეორეს.

¹¹ჭეშმარიტება აღმოცენდება დედამიწიდან და სიმართლე ზეციდან გადმოიხედავს.

¹²აჰა, უფალი გვიბოძებს სიკეთეს და ჩვენი მიწა გამოსცემს ნაყოფს.

¹³სიმართლე ივლის მის წინ და გზას გაუკაფავს მის ნაბიჯებს.