Read სბს–2013 ფსალმუნები 87 Bible Online

ფსალმუნები 87 - სბს–2013 bible

ფსალმუნები 87

¹გალობა. ფსალმუნი კორახის ძეთა. გუნდის ლოტბარს. მახალათის ხმაზე საგალობლად. მოძღვრება ჰემან ეზრახელისა. უფალო, ღმერთო ჩემი ხსნისა, შენს წინაშე ვღაღადებ დღისით და ღამით!

²მოვიდეს შენს წინაშე ჩემი ლოცვა, ყური მოაპყარ ვედრებას ჩემსას!

³რადგან აღივსო წუხილით სული ჩემი და ჩემი სიცოცხლე ჯოჯოხეთს უახლოვდება.

⁴შევირაცხე მათ გვერდით, ვინც სამარეში ჩადის, შევიქენი, ვითარცა კაცი უძლური,

⁵მკვდრებს შორის ჩაგდებული, განგმირული, სამარეში მდებარე, ვისაც აღარც იხსენებ, რადგან შენი ხელით არის განგმირული.

⁶მომათავსე ქვესკნელის ორმოში, წყვდიადსა და სიღრმეში.

⁷თავს დამატყდა შენი რისხვა, და ყველა შენმა ტალღამ ჩემზე გადაიარა.

⁸შენ განმაშორე ჩემი ნაცნობნი, საზიზღარი გამხადე მათთვის; დატყვევებული ვარ და ვერ გამოვდივარ.

⁹თვალი დამებინდა ტანჯვით; მოგიხმობდი, უფალო, ყოველდღე, შენსკენ ვიწვდიდი ხელებს.

¹⁰განა მკვდრებისთვის იქმ სასწაულებს? განა მიცვალებულნი წამოდგებიან და მადლობას შემოგწირავენ?

¹¹განა საფლავში ილაპარაკებენ შენს წყალობაზე, და ჯოჯოხეთში – შენს ჭეშმარიტებაზე?

¹²განა შეიცნობენ წყვდიადში შენს სასწაულებს და შენს სიმართლეს – დავიწყების ქვეყანაში?

¹³მე კი, უფალო, შენ გევედრები, განთიადისას ჩემი ლოცვა წინ გეგებება.

¹⁴რად მიატოვე, უფალო, სული ჩემი, შენი პირისახე დაფარე ჩემგან?

¹⁵საწყალი და ტანჯული ვარ ყრმობიდანვე, შენს საშინელებებს ვზიდავ; დავუძლურდი.

¹⁶თავზე გადამიარა შენმა რისხვამ, შიშის ზარმა გამანადგურა.

¹⁷მთელი დღე წყალივით გარს მივლიდნენ, გარს მერტყმოდნენ ყველანი ერთად.

¹⁸შენ განმაშორე მოყვასი და მეგობარი, ჩემი ნაცნობნი ბნელით მოცულან.