Read სბს–2013 ფსალმუნები 88 Bible Online

ფსალმუნები 88 - სბს–2013 bible

ფსალმუნები 88

¹მოძღვრება. ეთან ეზრახელისა. მარადჟამს ვუგალობებ უფლის წყალობებს, თაობებს აუწყებს შენს ჭეშმარიტებას ჩემი პირი.

²რადგან ვთქვი: უკუნისამდე დაფუძნდება წყალობა შენი, ცათა შინა განამტკიცებ ჭეშმარიტებას შენსას.

³შენ თქვი: „შევკარ პირობა ჩემს რჩეულთან, შევფიცე დავითს, ჩემს მსახურს:

⁴"უკუნისამდე დავადგენ შენს შთამომავლობას და თაობიდან თაობამდე დავაფუძნებ შენს ტახტს."

⁵განადიდებენ ზეცანი შენს საოცრებებს, უფალო, შენს ჭეშმარიტებას წმიდათა კრებულში!

⁶რადგან ვინ შეედრება ზეცაში უფალს, ვინ მიემსგავსება უფალს ღვთის შვილთა შორის?

⁷დიდებულია ღმერთი წმიდათა კრებულში, და საშიშია ყველასთვის ირგვლივ.

⁸უფალო, ღმერთო ძალთაო! ვინ არის შენებრ მძლავრი? შენი ჭეშმარიტება შენს გარშემოა!

⁹შენ ბატონობ ზღვის მოქცევაზე, შენ ამშვიდებ აბობოქრებულ ტალღებს.

¹⁰დაამსხვრიე რაჰაბი, როგორც განგმირული; ძლიერი მკლავით გაფანტე მტრები.

¹¹შენია ცანი, დედამიწაც შენია; სამყარო და მისი სავსება შენ დააფუძნე.

¹²ჩრდილოეთი და სამხრეთი შენ შეჰქმენი; თაბორი და ხერმონი შენს სახელს უმღერიან.

¹³შენია მკლავი მაგარი; ძლიერია ხელი შენი, მაღალია მარჯვენა შენი.

¹⁴სიმართლე და მართლმსაჯულებაა შენი ტახტის საფუძველი, წყალობა და ჭეშმარიტება შენი სახის წინაშე დადიან.

¹⁵კურთხეულია ხალხი, რომელიც სცნობს საზეიმო ხმებს, რომელნიც შენი სახის შუქით დადის, უფალო;

¹⁶ვინც შენი სახელით ილხენს ყოველდღე და შენს სიმართლეს ადიდებს.

¹⁷რადგან შენა ხარ დიდება მათი ძალისა, და შენი ნებით ამაღლდება ჩვენი რქა.

¹⁸რადგან უფალი არის ჩვენი ფარი და ისრაელის წმიდა – მეუფე ჩვენი.

¹⁹მაშინ დაელაპარაკე ხილვით შენს წმიდას და უთხარი: „ვუბოძე დახმარება გმირს; ავამაღლე რჩეული ხალხისაგან;

²⁰ვპოვე დავითი, მსახური ჩემი, და ჩემი წმიდა ზეთი ვცხე მას.

²¹ჩემი ხელი წარმართავს მას, და ჩემი მკლავი განამტკიცებს მას.

²²ვერ დაჯაბნის მას მტერი, და ვერც ურჯულოების ძე დაჩაგრავს მას.

²³მოვსრავ მის წინაშე მის მოდავეთ, და მის მოძულეებს დავამხობ;

²⁴ჭეშმარიტება და წყალობა ჩემი მასთანაა და ჩემი სახელით ამაღლდება ღირსება მისი.

²⁵ზღვას გადავაწვდენ მის ხელს, და მდინარეებს – მის მარჯვენას.

²⁶ის მომიხმობს: ‘შენ მამა ხარ ჩემი, ჩემი ღმერთი და ბურჯი ჩემი ხსნისა.’

²⁷და მეც პირმშოდ დავადგენ მას, ქვეყნიერების მეფეებზე აღმატებულებას ვუბოძებ,

²⁸უკუნისამდე შევუნარჩუნებ წყალობას ჩემსას, და ჩემი აღთქმა მტკიცე იქნება მისთვის.

²⁹დავამკვიდრებ უკუნისამდე მის ნაშიერს და მის ტახტს, ვითარცა დღეებს ზეცათა.

³⁰თუ მიატოვეს მისმა შვილებმა ჩემი რჯული და ჩემს სამართალს არ გაჰყვნენ,

³¹თუ ჩემს წესდებებს დაარღვევენ და ჩემს მცნებებს არ დაიცავენ,

³²კვერთხით მოვკითხავ მათ დანაშაულს და გვემით – შეცოდებას.

³³მაგრამ ჩემს წყალობას არ მოვუშლი მას და არ გავაცრუებ ჩემს ერთგულებას.

³⁴არ უარვყოფ ჩემს აღთქმას და არ შევცვლი, რაც აღმოხდა ჩემს ბაგეებს.

³⁵ერთხელ შევფიცე ჩემი სიწმიდით; არ ვეცრუები დავითს.

³⁶მისი ნაშიერი მარადჟამს იქნება და მისი ტახტი, ვითარცა მზე, ჩემს წინაშე;

³⁷დამკვიდრდება მთვარესავით უკუნისამდე, და იქნება ჭეშმარიტი მოწმე ზეცაში.“

³⁸მაგრამ ახლა მიატოვე და შეიზიზღე, განრისხდი შენს ცხებულზე!

³⁹უგულებელჰყავ აღთქმა შენს მორჩილთან, მიწას დაანარცხე გვირგვინი მისი;

⁴⁰მოშალე ყველა ზღუდენი მისნი; ნანგრევებად აქციე მისი სიმაგრენი.

⁴¹ძარცვავს მას ყველა გამვლელ-გამომვლელი, მეზობლის დასაცინი გახდა;

⁴²მაღლა ასწიე მის მოშუღართა მარჯვენა, გაახარე ყველა მისი მტერი.

⁴³დააჩლუნგე მისი მახვილი და არ შეეწიე გამარჯვებით ომში;

⁴⁴გააცამტვერე სიწმიდე მისი და ტახტი მისი მიწასთან გაასწორე;

⁴⁵შეამცირე დღენი მისი სიჭაბუკისა, და სირცხვილით შემოსე იგი.

⁴⁶როდემდე დაგვეფარები, უფალო? ნუთუ მარადჟამს იგიზგიზებს ცეცხლივით შენი რისხვა?

⁴⁷გაიხსენე, რა არის ჩემი წუთისოფელი; როგორ ამაოებად შეჰქმენი ყოველი ძე კაცისა!

⁴⁸ვინ არის კაცი, რომ სიკვდილი არ იხილოს, და იხსნას სული თვისი ჯოჯოხეთის ხელთაგან?

⁴⁹სად არის შენი ძველი წყალობა, უფალო, დავითს რომ შეჰფიცე შენი ჭეშმარიტებით?

⁵⁰გაიხსენე, უფალო, შენს მორჩილთა დამცირება, უბით რომ ვატარებ ძლიერ ხალხთაგან.

⁵¹როგორ მწყევლიან შენი მტრები, უფალო, როგორ წყევლიან შენი ცხებულის კვალს.

⁵²კურთხეულ არს უფალი უკუნისამდე! ამინ, ამინ!