Read სბს–2013 ფსალმუნები 9 Bible Online

ფსალმუნები 9 - სბს–2013 bible

ფსალმუნები 9

¹გუნდის ლოტბარს, ლაბანის სიკვდილზე. ფსალმუნი დავითისა. მადლობას შეგწირავ შენ, უფალო, მთელი გულით, ვაუწყებ მთელ შენს სასწაულებს.

²ვიხარებ და ვილხენ შენით, ვუგალობებ შენს სახელს, უზენაესო.

³როდესაც დაბრუნდნენ ჩემი მტრები უკან, დამარცხდნენ და დაიღუპნენ შენს წინაშე;

⁴რადგან შენ გაარჩიე ჩემი დავა და სამართალი; დაბრძანდი ტახტზე, სიმართლის მსაჯულო.

⁵განრისხდი ერებზე, მოსპე ბოროტი, მათი სახელი წაშალე უკუნითი უკუნისამდე.

⁶მტერი გაქრა, გაპარტახდა სამუდამოდ, შენ დაანგრიე მათი ქალაქები, მათთან ერთად მოისპო მათი ხსენება.

⁷უფალი კი ტახტზე ზის უკუნისამდე. სამართლისათვის დაადგინა მან თვისი ტახტი.

⁸სიმართლით განსჯის სამყაროს, გაასამართლებს ხალხებს სისწორით.

⁹უფალი არის ჩაგრულის შემწე, დასაყრდენი გასაჭირის ჟამს.

¹⁰შენ მოგენდობიან შენი სახელის მცოდნენი, ვინაიდან არ მიატოვებ, უფალო, შენს მაძიებლებს.

¹¹უგალობეთ უფალს, სიონის მკვიდრს! აუწყეთ მისი საქმენი ხალხებს!

¹²რადგან ის იძიებს მათ სისხლს, ახსოვს ისინი, არ ივიწყებს ტვირთმძიმეთა გოდებას.

¹³შემიწყალე, უფალო, იხილე ჩემი შეჭირვება მოძულეებისაგან, გამომაბრუნე სიკვდილის კარიბჭიდან,

¹⁴რათა ვაუწყო შენი ქება, სიონის ასულის კარიბჭეებთან ვიხარო შენმიერი ცხონებით.

¹⁵ჩაცვივდნენ ერები თავიანთ ამოთხრილ ორმოში, მათ მიერ გამზადებულ ბადეში გაება მათივე ფეხი.

¹⁶გაცხადდა უფალი, ქმნა სამართალი; ბოროტი გაება თავისი ხელით დაგებულ მახეში.

¹⁷ჩაცვივდებიან ბოროტნი ჯოჯოხეთში, ყველა ერები, რომელნიც ივიწყებენ ღმერთს.

¹⁸სამუდამოდ არ იქნება დავიწყებული ღატაკი, არც უპოვართა იმედი დაიღუპება სამარადისოდ.

¹⁹აღსდექ, უფალო, ნუ იმძლავრებს კაცი; გაასამართლე ერები შენს წინაშე.

²⁰შიშის ზარი დაეცი მათ, უფალო! დაე შეიტყონ ერებმა, რომ მხოლოდ და მხოლოდ ადამიანები არიან ისინი!

²¹რატომ დგახარ, უფალო, შორს? რატომ მარიდებ თვალს გაჭირვების ჟამს?

²²ქედმაღლად დევნიან ბოროტნი ღატაკთ; დაე შეპყრობილ იქნენ მზაკვრობით, რომელიც განიზრახეს.

²³რადგან ტრაბახობს ბოროტი თავისი სულის ავხორცობით, და ანგარების მოყვარული უარყოფს უფალს.

²⁴ბოროტი თავისი ქედმაღლობით არ ეძიებს მას, მისი აზრით არ არსებობს ღმერთი.

²⁵წარმატებულია მისი გზა ყოველ ჟამს; მიუწვდომელია შენი სამართალი მისთვის; სულის შებერვით ამარცხებს თავის მტრებს.

²⁶ამბობს თვის გულში: არ წავბორძიკდები, თაობიდან თაობამდე არ შემხვდება სიავე.

²⁷მისი პირი სავსეა წყევლით, სიცრუით და ჩაგვრით; მისი ენა – სიმრუდე და უკუღმართობაა.

²⁸ჩასაფრდება ეზოებს უკან, სამალავიდან კლავს უდანაშაულოს, მისი თვალები საწყლებს უთვალთვალებენ,

²⁹უდარაჯდება საფარში, როგორც ლომი შამბნარში, უსაფრდება საწყალს მოსატაცებლად; მოიტაცებს, ოდეს მოიმწყვდევს თავის ბადეში.

³⁰მოიზნიქება, გაწვება და საწყლებს თავის ბრჭყალებში მოაქცევს.

³¹ამბობს თვის გულში: დაივიწყა ღმერთმა, სახე დამალა, ვერ იხილავს ვერასოდეს.

³²აღსდექ, უფალო! ღმერთო, აღმართე ხელი, ნუ დაივიწყებ ჩაგრულებს.

³³რად უგულებელყოფს ბოროტი ღმერთს და ამბობს თვის გულში, რომ არ მოჰკითხავ?

³⁴მაგრამ შენ ხედავ; ხედავ წყენასა და შევიწროებას, რათა სამაგიერო გადაუხადო შენი ხელით, შენ განდობს თავის თავს ჩაგრული, შენ ხარ ობოლის შემწე.

³⁵გადაამსხვრიე ბოროტისა და უკეთურის მკლავი! გამოიძიე მისი ბოროტება, სანამ ვეღარც ერთს ვეღარ იპოვი!

³⁶უფალი ხელმწიფეა უკუნითი უკუნისამდე, აღიგვებიან წარმართნი მისი ქვეყნიდან.

³⁷უფალო, ისმინე მორჩილთა გოდება, შეამზადე მათი გული, მიაპყარ ყური;

³⁸მიეც სამართალი ობოლს და ჩაგრულს, რომ აღარ თესონ ადამიანებმა შიში ქვეყანაზე.