Read სბს–2013 ფსალმუნები 91 Bible Online

ფსალმუნები 91 - სბს–2013 bible

ფსალმუნები 91

¹ფსალმუნი. გალობა შაბათის დღისათვის. კარგია, მადლი შევწიროთ უფალს, და ვუგალობოთ დიდება შენს სახელს, უზენაესო!

²ვაუწყოთ დილ-დილობით შენი წყალობა და შენი ერთგულება – ღამ-ღამობით.

³ათსიმიანსა და ჩანგზე, ქნარზე გალობით.

⁴რადგან შენ გამახარე, უფალო, შენი საქმეებით, შენს ხელთა საქმეს ვუმღერებ ლხენით.

⁵რაოდენ ღრმაა შენი ზრახვანი, უფალო, რაოდენ დიდია შენი საქმენი!

⁶უგუნური კაცი ვერ შეიცნობს და უმეცარი ვერ გაიგებს ამას,

⁷რადგან თუმცა ბოროტნი ყვავიან ბალახივით, და სიმრუდის მოქმედნი იფურჩქნებიან, ისინი დაიღუპებიან სამუდამოდ.

⁸შენ კი მაღალი ხარ მარადჟამს, უფალო!

⁹რადგანაც, შენი მტრები, უფალო, რადგანაც აგერ შენი მტრები დაიღუპებიან, განიბნევა ყველა სიმრუდის მოქმედი.

¹⁰მაგრამ შენ აამაღლებ რქას ჩემსას მარტორქის რქასავით, ახალ ზეთს მცხებ მე.

¹¹ჩემი თვალი იხილავს ჩემი მტრების დაცემას, ჩემს წინააღმდეგ აღმდგარ ბოროტმოქმედებზე გაიგონებენ ჩემი ყურები.

¹²წმიდანნი კი ფინიკივით გაიფურჩქნებიან, ლიბანის კედარივით წამოიმართებიან.

¹³უფლის სახლში არიან დარგულნი, ჩვენი ღმერთის ეზოებში ყვავიან;

¹⁴სიბერეშიც გამოიღებენ ნაყოფს, წვნიანსა და ხასხასას;

¹⁵რათა გაცხადდეს, რომ მართალია უფალი; ის არის ჩემი საყრდენი, და არ არის მასში უსამართლობა.