Read სბს–2013 იგავნი სოლომონისა 13 Bible Online

იგავნი სოლომონისა 13 - სბს–2013 bible

იგავნი სოლომონისა 13

¹ბრძენ შვილს უყვარს მამის შეგონება, თავხედი კი ყურს არ უგდებს მხილებას.

²გონიერი თავის ბაგეთა სიტყვების კეთილ ნაყოფს იგემებს, უღმრთოთა მისწრაფება კი ბოროტებას იმკის.

³ვინც თავის ბაგეებს უფრთხილდება, თავის სიცოცხლეს იცავს, ყბედს კი უბედურება ელის.

⁴ზარმაცის სულს სწადია და არა აქვს, ბეჯითის სული კი აღივსება.

⁵მართალს სძულს ცრუ სიტყვა, უკეთური კი სამარცხვინოდ და უღირსად იქცევა.

⁶უბიწოს სიმართლე იცავს მის გზაზე, უკეთურს კი ცოდვა ღუპავს.

⁷ზოგი მდიდრად აჩვენებს თავს და არაფერი აქვს, ზოგი კი – ღარიბად და დიდი ქონება აქვს.

⁸მდიდარს სიმდიდრე სიცოცხლის გამოსასყიდად შეიძლება დასჭირდეს, ღარიბს კი ეს საფრთხე არ ემუქრება.

⁹მართალთა ნათელი ბრწყინავს, უკეთურთა სანთელი კი ქრება.

¹⁰ამპარტავნება წარმოშობს შუღლს, ხოლო სადაც რჩევაა, იქ სიბრძნეა.

¹¹ქარით მოტანილი ქონება მცირდება, შრომით შემკრებელი კი ამრავლებს მას.

¹²აუხდენელი იმედი გულს ქანცავს, აღსრულებული სურვილი კი სიცოცხლის ხეა.

¹³ვინც სიტყვას არაფრად აგდებს, დაზარალდება, მცნების მოშიში კი საზღაურს მიიღებს.

¹⁴ბრძენის დარიგება სიცოცხლის წყაროა, სიკვდილის მახისგან გამრიდებელი.

¹⁵კეთილგონიერება მადლის მომცემია, ორგულთა გზა კი წარწყმედაა.

¹⁶ყოველი გონიერი საზრიანად მოქმედებს, უგუნურნი კი სისულელეს ამჟღავნებენ.

¹⁷უკეთურ მაცნეს უბედურება მოაქვს, ერთგულ მოამბეს კი – კურნება.

¹⁸სიღარიბე და დამცირება ეწევა მას, ვინც დარიგება უკუაგდო; ხოლო შეგონების დამცველი პატივში იქნება.

¹⁹აღსრულებული სურვილი სულს ეამება, რეგვენს კი სძაგს ბოროტებისაგან განდგომა.

²⁰ბრძენთან ერთად მავალი დაბრძენდება, უგუნურთა მეგობარი კი დაზარალდება.

²¹ცოდვილებს ბოროტება თან სდევთ, მართალთ კი კეთილდღეობა მიეზღვებათ.

²²კეთილი კაცი შვილთაშვილთ მემკვიდრეობას უტოვებს, ცოდვილის ქონება კი მართლთათვის ინახება.

²³ღარიბთა ყანებშიც შეიძლება კარგი მოსავალი მოვიდეს, მაგრამ უსამართლობით დაეკარგოს.

²⁴ვინც თავისი შვილისთვის წკეპლას ზოგავს, სძულს ის, ხოლო ვისაც უყვარს შვილი, ბეჯითად წვრთნის მას.

²⁵მართალი ძღომაზე ჭამს, უკეთურთა მუცელი კი ცარიელია.