Read სბს–2013 იგავნი სოლომონისა 19 Bible Online

იგავნი სოლომონისა 19 - სბს–2013 bible

იგავნი სოლომონისა 19

¹უმწიკვლოდ მავალი ღატაკი სჯობს ცრუსა და თანაც უგუნურს.

²სურვილი ცოდნის გარეშე ცუდია, ფეხს ვინც ააჩქარებს, კვალი აერევა.

³კაცს საკუთარი უგუნურება ღუპავს, მაგრამ მისი გული უფალს ემდურის.

⁴სიმდიდრე კაცს მეგობრებს მატებს, უქონელი კი იმათაც კარგავს, ვინცა ჰყავს.

⁵ცრუმოწმე დაუსჯელი არ დარჩება და სიცრუის მთქმელი ვერ გადარჩება.

⁶ბევრი ეძებს წყალობას დიდებულთაგან და უხვად გამცემთან ყველა მეგობრობს.

⁷ღარიბი მის ძმებსაც კი სძულთ, კიდევ უფრო გაურბიან მას მეგობრები! ეძახის და არ აქცევენ ყურადღებას.

⁸სიბრძნის მოპოვება საკუთარი თავის სიყვარულს ნიშნავს; ვინც გონიერებას იცავს, სიკეთეს ჰპოვებს.

⁹ცრუ მოწმე დაუსჯელი არ დარჩება და ტყუილის მთქმელი დაიღუპება.

¹⁰ბრიყვს არ შეჰფერის ფუფუნება, კიდევ უფრო ნაკლებად მონას – ბატონობა მთავრებზე.

¹¹გონიერება ადამიანს სულგრძელს ხდის და მისი ღირსება წყენის დავიწყებაა.

¹²ლომის ბრდღვინვას ჰგავს მეფის რისხვა, მისი წყალობა კი ცვარ-ნამის მსგავსია.

¹³ბრიყვი შვილი მამის უბედურებაა, ჭირვეული ცოლი კი სახურავიდან წყლის შეუწყვეტელი წანწკარი.

¹⁴სახლი და ქონება მამის მემკვიდრეობაა, გონიერი ცოლი კი უფლისგანაა.

¹⁵მცონარება ძილს ჰგვრის კაცს და უქნარა სული იშიმშილებს.

¹⁶მცნების დამცველი იცოცხლებს, ხოლო ვინც უფლის გზებს აბუჩად იგდებს – მოკვდება.

¹⁷ღატაკის გამკითხველი უფალს აძლევს სესხს და ის მიაგებს მას სამაგიეროს.

¹⁸გაწვრთენი შვილი, სანამ დროა და ნუ დააღუპვინებ თავს.

¹⁹გულბოროტი და ბრაზიანი მკაცრად დასაჯე, თუ დაინდობ, კვლავ მოგიწევს დასჯა.

²⁰ისმინე რჩევა და მიიღე დარიგება, რათა მოიპოვო სიბრძნე სამომავლოდ.

²¹მრავალი განზრახვაა კაცის გულში, მაგრამ მხოლოდ უფლისგან განსაზღვრული ასრულდება.

²²კაცის სიკეთე მისი მოწყალე გულია; და ღატაკი სჯობს მატყუარას.

²³უფლის შიში მაცოცხლებელია, მისი მოშიში კმაყოფილი იქნება და არ ეწევა ბოროტი.

²⁴ზარმაცს ხელი ჯამში აქვს, მაგრამ პირთან მიტანა ეზარება.

²⁵უკეთურს ურტყი და გულუბრყვილოც გაიგებს; შეაგონე გონიერს და ჭკუას ისწავლის.

²⁶მამის მაგინებელი და დედის გამძევებელი შერცხვენისა და ყვედრების ღირსია.

²⁷ნუ უგულვებელყოფ, შვილო ჩემო, შეგონებას, რათა გონიერი სიტყვები არ დაგეკარგოს.

²⁸უღირსი მოწმე სამართალს დასცინის, და უკეთურთა პირი უსამართლობას ნთქავს.

²⁹უზნეოთათვის სასჯელი მზადაა და რეგვენთა ზურგისთვის – სახრე.