Read სბს–2013 იგავნი სოლომონისა 21 Bible Online

იგავნი სოლომონისა 21 - სბს–2013 bible

იგავნი სოლომონისა 21

¹მეფის გული წყლის ნაკადია უფლის ხელში, საითაც მოისურვებს, იქით მიმართავს მას.

²კაცის ყველა გზა სწორია მის თვალში, ხოლო გულს უფალი წონის.

³სიმართლისა და სამართლის ქმნა მსხვერპლშეწირვაზე სასურველია უფლისათვის.

⁴მედიდური თვალი და ამპარტავანი გული, ეს უკეთურთა ლამპარი – დიდი ცოდვაა.

⁵ბეჯითის ზრახვანი მატებას იწვევს, ხოლო დაუდევრისა – კლებას.

⁶სიცრუით სიმდიდრის მოხვეჭა წარმავალი ორთქლია და სიკვდილის მახე.

⁷უკეთურთ მათივე ძალადობა წალეკავს, რადგან ისინი უარს ამბობენ სამართლის ქმნაზე.

⁸მრუდეა დამნაშავეს გზა, ხოლო სუფთა კაცისა – წრფელი.

⁹სხვენის კუნჭულში ცხოვრება სჯობია ანჩხლ დედაკაცთან ერთ ჭერქვეშ ყოფნას.

¹⁰უკეთურის სულს ბოროტება სწადია; მოყვასი მის თვალში წყალობას ვერ პოულობს.

¹¹უზნეო როდესაც ისჯება, გულუბრყვილო ბრძენდება, ბრძენი კი შეგონებით იძენს ცოდნას.

¹²მართალი აკვირდება უკეთურის სახლს; ის დაეცემა და განადგურდება.

¹³ვინც ღარიბთა კვნესას წაუყრუებს, ერთ დღეს ისიც აკვნესდება, მაგრამ არავინ შეიწყნარებს.

¹⁴ფარული ძღვენი წყრომას აცხრობს, რისხვას კი უბეში ჩადებული ქრთამი.

¹⁵სამართლის ქმნა სიხარულია მართლისათვის და შიშის ზარი – ბოროტთათვის.

¹⁶გონიერ გზას აცდენილი კაცი მკვდართა კრებულში განისვენებს.

¹⁷სიამეთა მოყვარული გაღატაკდება, ღვინისა და ფერ-უმარილის მოყვარული ვერ გამდიდრდება.

¹⁸ბოროტი მართლის გამოსასყიდია და მზაკვარი – გულწრფელისა.

¹⁹უდაბნოში ცხოვრება სჯობს ანჩხლ და კაპას ცოლთან ყოფნას.

²⁰ძვირფასი განძი და ნელსაცხებელი ბრძენის სახლში რჩება, ბრიყვი კი ფლანგავს მათ.

²¹სიმართლისა და მოწყალების მიმდევარი კაცი სიცოცხლესა და პატივს ჰპოვებს.

²²ბრძენი დაიპყრობს ძლიერთა ქალაქს და დაანგრევს მათ საიმედო სიმაგრეს.

²³ბაგისა და ენის შემაკავებელი, თავს იცავს უბედურებისაგან.

²⁴„დამცინავს“ უწოდებენ ზვიადსა და ამპარტავანს, ის ქედმაღალი სიამაყით მოქმედებს.

²⁵ზარმაცს მისი სურვილები დაღუპავს, რადგან მისი ხელი უარს ამბობს გარჯაზე.

²⁶მას ყოველდღე ხარბად სწადია რაღაც, მართალი კი გასცემს და არ ზოგავს.

²⁷უკეთურთა მსხვერპლი სისაძაგლეა, მით უფრო, თუ ცბიერებით არის შეწირული.

²⁸ცრუ მოწმე დაიღუპება, ხოლო ვინც თავისი ყურით მოსმენილს ამბობს, მუდამ ილაპარაკებს.

²⁹უკეთური კაცი კარგი კაცის ნიღაბს ირგებს, წრფელი კი თავის გზას უკვირდება.

³⁰არც სიბრძნე და არც გონება, არც რჩევა არ არგებს არავის, თუ ის უფლის საწინააღმდეგოა.

³¹ცხენს ბრძოლის დღისათვის ამზადებენ, მაგრამ გამარჯვება უფლისგანაა.