Read სბს–2013 იგავნი სოლომონისა 22 Bible Online

იგავნი სოლომონისა 22 - სბს–2013 bible

იგავნი სოლომონისა 22

¹კეთილი სახელი სიმდიდრეზე უკეთესია და ადამიანთა კეთილგანწყობა – ოქროსა და ვერცხლზე.

²მდიდარი და ღატაკი ერთად შეიყრებიან – ორივე უფლის ქმნილებაა.

³გონიერი ხედავს საფრთხეს და გაერიდება, ბრიყვები კი არ ეპუებიან და ისჯებიან.

⁴თავმდაბლობის და უფლის შიშის საზღაური არის სიმდიდრე, პატივი და სიცოცხლე.

⁵ეკალი და მახეა უკეთურის გზაზე, ფრთხილი კი გაერიდება მათ.

⁶ყმაწვილი თავიდანვე სწორად გაწვრთენი და სიბერეშიც არ გადაუხვევს გზიდან.

⁷მდიდარი ღატაკებზე მბრძანებლობს და მოვალე მონაა მევალისა.

⁸უსამართლობის მთესველი უბედურებას მოიმკის და მისი მრისხანების კვერთხი გადაიმსხვრევა.

⁹გულმოწყალე კურთხეული იქნება, რადგან ლუკმა გაუყო ღარიბს.

¹⁰გააგდე თავხედი და გაჰყვება შუღლი; დავას და ლანძღვას ბოლო მოეღება.

¹¹ვისაც სუფთა გული აქვს და კეთილი ენა, მეფის მეგობარი გახდება.

¹²უფლის თვალები ცოდნას მფარველობენ, ორპირის ნათქვამს კი უკუაგდებენ.

¹³მცონარა ამბობს: ლომია გარეთ, შუა მოედანზე მომკლავს.

¹⁴როსკიპის პირი ღრმა ორმოა, უფლის შერისხული შიგ ჩავარდება.

¹⁵ყმაწვილის გულში უგუნურება ბუდობს, მაგრამ აღმზრდელის წკეპლა გამოდევნის მას.

¹⁶ვინც ღარიბ-ღატაკს ავიწროებს გასამდიდრებლად და ვინც მდიდარს აძლევს – ორივე დაკარგავს.

¹⁷ყური დამიგდე და ისმინე ბრძენთა სიტყვები, და მოაპყარ გული ჩემს სწავლებას,

¹⁸რადგან ის სიამეს მოგგვრის, თუკი შენში დაიმარხავ და მუდამ პირზე გეკერება.

¹⁹დღეს გაუწყებ მე შენ მათ, რათა სასოება გქონდეს უფლისა.

²⁰განა არ მოგწერე 30 შეგონება, სადაც ნახავდი რჩევებსა და ცოდნას,

²¹რათა მეჩვენებინა შენთვის, რა არის ჭეშმარიტი და მართალი, რათა გადასცე ჭეშმარიტების სიტყვები შენს მომავლინებელთ?

²²ნუ გაძარცვავ ღარიბს, რადგან ღარიბია, და ნუ დაჩაგრავ უბედურს კარიბჭესთან,

²³რადგან უფალი გამოესარჩლება მათ, და მათი გაძარცვისათვის სიცოცხლეს წაგართმევს.

²⁴ნუ დაუმეგობრდები გულმწყრალს და გულფიცხელ კაცს ნუ გაეკარები,

²⁵რომ არ აჰყვე მის გზებს და მახე არ დაუგო შენს სულს.

²⁶ნუ იქნები მათ შორის, ვინც ხელს აძლევს და თავდებად უდგება მოვალეებს.

²⁷რადგან თუ ვერაფრით გადაიხდი, რატომ იგდებ თავს იმ დღეში, რომ ქვეშაგებიც გამოგაცალონ?

²⁸ნუ გადასწევ ძველ საზღვარს, შენმა მამებმა რომ დადეს.

²⁹თუ გინახავს თავისი საქმის ოსტატი? ის მეფეთა წინაშე წარსდგება და არ მოემსახურება მდაბიოთ.