Read სბს–2013 იგავნი სოლომონისა 29 Bible Online

იგავნი სოლომონისა 29 - სბს–2013 bible

იგავნი სოლომონისა 29

¹თუ მრავალგზის მხილებული მაინც ქედფიცხელობს, ანაზდეულად გადატყდება და არ იქნება მისთვის კურნება.

²მართალთა აღზევებისას ხალხი ხარობს; უკეთურთა ბატონობისას კი გმინავს.

³სიბრძნის მიმდევარი მამას ახარებს; მეძავთა ამყოლი კი ქონებას ანიავებს.

⁴მეფე სამართლით განამტკიცებს ქვეყანას; მძიმედ დამბეგრავი კი ამხობს მას.

⁵მოყვასთან მლიქვნელი, მახეს უგებს მას ფეხქვეშ.

⁶ბოროტი კაცი დანაშაულის ხაფანგში ებმება, ხოლო მართალი მღერის და ხარობს.

⁷მართალმა იცის ღატაკთა უფლებები, უკეთურს არა აქვს ეს ცოდნა.

⁸თავქარიანები ცეცხლს უკიდებენ ქალაქს, ხოლო ბრძენნი უკუაქცევენ რისხვას.

⁹სულელ კაცთან მოდავე ბრძენკაცს, ბრაზობს თუ იცინის, სულერთია, არ ექნება მოსვენება.

¹⁰სისხლის მოყვარულებს სძულთ უბიწო, წრფელნი კი ზრუნავენ მასზე.

¹¹ბრიყვი მთელ თავის რისხვას გამოხატავს, ბრძენი კი თავს იკავებს.

¹²თუ მმართველი სიცრუეს ყურს მიუგდებს, მისი ყველა მსახური უკეთური იქნება.

¹³ღატაკს და თაღლითს ერთი აქვთ საერთო: თვალის ჩინს ორივეს უფალი აძლევს.

¹⁴მეფე, რომელიც სამართლიანად ასამართლებს ღარიბთ, სამუდამოდ განამტკიცებს თავის ტახტს.

¹⁵წკეპლას და შეგონებას სიბრძნე მოაქვს, მიშვებული ყმაწვილი კი დედის შემარცხვენელია.

¹⁶უკეთურთა მმრთველობისას დანაშაული მრავლდება; მაგრამ მართალნი იხილავენ მათ დამხობას.

¹⁷გაწვრთენი შვილი და შვებას მოგგვრის. სიამეს მიანიჭებს შენს გულს.

¹⁸თუ გამოცხადებები არ არის მაღლიდან, ხალხი თავს იშვებს; ნეტარია რჯულის დამცველი.

¹⁹სიტყვით ვერ გაწვრთნი მონას, რადგან კიდევაც რომ გაიგოს, არ დაგიჯერებს.

²⁰გინახავს სიტყვაჩქარი კაცი? ბრიყვის მეტი იმედი გქონდეს, ვიდრე ამგვარი კაცისა.

²¹მონას თუ სიყრმიდანვე გაანებივრებ, მემკვიდრედ გაგიხდება.

²²მრისხანე კაცი შუღლს თესავს, და გულფიცხი ბევრს ცოდავს.

²³ქედმაღლობას დამცირება მოსდევს, თვინიერებას კი დიდება მოაქვს.

²⁴ქურდის მოზიარე თავის მოძულეა; ესმის როგორ წყევლიან ქურდს, მაგრამ არ ამხელს.

²⁵კაცის შიში მახეა, უფალს მინდობილი კი ხელშეუხებელია.

²⁶მრავალი ეძებს ბატონის მოწყალე სახეს, მაგრამ კაცის ბედი უფლის ხელთაა.

²⁷მართალთათვის საზიზღრობაა უსამართლო კაცი, ხოლო უკეთურთათვის სწორი გზით მავალია საზიზღრობა.