Read სბს–2013 იგავნი სოლომონისა 5 Bible Online

იგავნი სოლომონისა 5 - სბს–2013 bible

იგავნი სოლომონისა 5

¹შვილო ჩემო, უსმინე ჩემს სიბრძნეს და ყური მიაპყარ ჩემს სწავლებას,

²რათა შეინარჩუნო გონიერება და შენმა ბაგეებმა დაიმარხონ ცოდნა.

³რადგან თაფლი მოსწვეთს უცხო ქალის ბაგეთაგან და ზეთივით ნაზია მისი სიტყვები,

⁴ბოლოს კი აბზინდაზე უმწარესი გახდება და ბასრი, ვით ორლესული მახვილი.

⁵მისი ფეხი სიკვდილისკენ მიდის, შავეთისკენ მიემართება,

⁶სიცოცხლის გზაზე ვერ დადის, გზა-კვალი არეული აქვს, ვეღარას აგნებს.

⁷მაშ მისმინეთ, შვილებო და ნუ უკუიქცევით ჩემს სიტყვათაგან.

⁸შორს დაიჭირე თავი მისგან და მისი სახლის ზღურბლს ნუ მიუახლოვდები,

⁹რათა არ მისცე სხვებს შენი ღირსება და წლები შენი სიცოცხლისა – დაუნდობელთ,

¹⁰რათა არ აღივსონ სხვები შენი ძალით, და შენი ნაოფლარით არ გაივსოს უცხოთა სახლები.

¹¹და აკვნესდები ბოლოს, როცა ძვალ-ტყავად იქცევი,

¹²და იტყვი: „რად მოვიძულე დარიგება და შეგონება რად შეიძაგა ჩემმა გულმა?

¹³რად არ ვუსმინე ჩემს მწვრთნელთა ხმას, რად არ მივაპყარ ყური დარიგებებს?

¹⁴განადგურების პირასა ვარ თემისა და ხალხის წინაშე.“

¹⁵სვი წყალი შენი ჭიდან და შენი წყაროდან.

¹⁶რად უნდა იდინონ შენმა წყაროებმა ქუჩებში და ნაკადულებმა – მოედნებზე?

¹⁷მხოლოდ შენი იყოს ისინი და უცხო ნურავინ ჩაგეზიარება.

¹⁸კურთხეულ იყოს შენი წყარო და იხარე შენი სიჭაბუკის მეუღლით,

¹⁹საყვარელი შვლითა და ტურფა ნიამორით. მისმა მკერდმა მოგიკლას წყურვილი მარადჟამ, მისი სიყვარულით ტკბებოდე მუდამ!

²⁰რატომ გიტაცებს, შვილო ჩემო, უცხო ქალი და რატომ ეხვევი უზნეოს მკერდს?

²¹რამეთუ უფლის თვალწინაა კაცის გზები, და ის ხედავს მის ყოველ ნაბიჯს.

²²საკუთარი ავკაცობა შეიპყრობს უკეთურს და თავისი ცოდვის ბორკილებში გაიხლართება;

²³მოკვდება უგუნურებით, უზომო სიბრიყვით დაიკარგება.