Read სბს–2013 იგავნი სოლომონისა 6 Bible Online

იგავნი სოლომონისა 6 - სბს–2013 bible

იგავნი სოლომონისა 6

¹შვილო ჩემო, თუ თავდებად დაუდექი შენს ახლობელს, თუ ხელი მიეცი სხვისთვის, –

²მახეში გაები შენი სიტყვით, შენი ბაგეთა ნათქვამის ტყვედ ქცეულხარ.

³ეცადე, შვილო ჩემო, და რაღაც იღონე, რომ გადარჩე შენი მეზობლის ხელიდან: წადი, იჩქარე, შეეხვეწე, არ მოეშვა;

⁴თვალი არ მოხუჭო, ძილი არ მიაკარო შენს ქუთუთოებს,

⁵იხსენი თავი, როგორც ქურციკმა მონადირისაგან და ვით ფრინველმა ფრინველთა მჭერისგან.

⁶მიდი ჭიანჭველასთან, მცონარავ, დააკვირდი მის გზებს და ისწავლე სიბრძნე.

⁷არა ჰყავს მას არც უფროსი, არც ზედამხედველი და არც ბატონი.

⁸ზაფხულში იმზადებს საზრდოს და მოსავლის აღებისას აგროვებს საკვებს.

⁹როდემდე იწვები, მცონარავ? როდის გეღირსება გაღვიძება?

¹⁰ცოტას კიდევ იძინებ, ცოტას წასთვლემ, კიდევ იქნები გულხელდაკრეფილი,

¹¹და თავს დაგადგება სიღატაკე მაწანწალასავით, და გაჭირვება – ყაჩაღივით.

¹²კაცი უგვანი და უსამართლო სიცრუეს ვერ იშლის,

¹³თვალებს ჭუტავს, ფეხს იცვლის, ხანაც თითებს იშვერს.

¹⁴მანკიერია მისი გული, ბოროტს განიზრახავს ყოველ ჟამს, განხეთქილებას თესავს.

¹⁵ამიტომ ანაზდად ეწევა უბედურება და უკურნებელი მარცხი.

¹⁶ექვსი რამ სძულს უფალს და შვიდი რამ ეზიზღება:

¹⁷ამპარტავანი მზერა, ცრუ ენა, უცოდველი სისხლით დასვრილი ხელი,

¹⁸ბოროტ ზრახვათა მზრახველი გული, ბოროტებისკენ მორბენალი ფეხი,

¹⁹ცრუ და მზაკვარი მოწმე, და ძმათა შორის შუღლის მთესავი.

²⁰დაიცავი, შვილო ჩემო, მცნება მამისა, და დედის დამოძღვრას ნუ გადახვალ.

²¹გულზე დაიბნიე სამუდამოდ და ყელზე შემოიხვიე;

²²სიარულისას გიწინამძღვრებენ, ძილში დაგიფარავენ და გამოღვიძებულს კეთილად გესაუბრებიან.

²³რადგან მცნება ლამპარია, სწავლა – სინათლეა, ხოლო შეგონება სიცოცხლის გზაა.

²⁴ისინი დაგიფარავენ ავი ქალისაგან, უცხო ქალის დაშაქრული ენისაგან.

²⁵გულში ნუ ჩაგეჭრება მისი მშვენება, და ნუ დაგატყვევებს თავისი წამწამებით,

²⁶რადგან მეძავის ფასი ნატეხი პურია, სხვისი ცოლი კი მთელი შენი სიცოცხლის მომნადირებელია.

²⁷ვინ გამოიკრავს ცეცხლს უბეში, სამოსელი რომ არ დაეწვას?

²⁸თუ გაივლის ვინმე ნაკვერცხლებზე ფეხების დაუწველად?

²⁹ასევეა სხვის ცოლთან მიმსვლელიც, დამნაშავე იქნება მისი მიმკარებელი.

³⁰არ შეიზიზღებენ ქურდს, რომელიც ლუკმაპურს იპარავს მშიერი;

³¹მაგრამ თუ წაასწრებენ პარვაზე, შვიდმაგად ახდევინებენ, მთელ ქონებას ართმევენ.

³²ვინც ქმრიან ქალთან მრუშობს, უგუნურია. თავს იღუპავს ამის ჩამდენი.

³³გვემასა და დამცირებას ჰპოვებს და მისი სირცხვილი ვერ წარიხოცება.

³⁴რადგან ეჭვიანობა ქმარს განარისხებს, და არ დაინდობს ის შურისგების დღეს.

³⁵არ მიიღებს გამოსასყიდს და არ მოლბება, რაც უნდა აძლიო.