Read სბს–2013 ეკლესიასტე 11 Bible Online

ეკლესიასტე 11 - სბს–2013 bible

ეკლესიასტე 11

¹წყალს გაატანე შენი პური, გავა ხანი და უკან დაგიბრუნდება.

²გაანაწილე შენი ქონება შვიდ ან რვა ნაწილადაც კი, რადგან არ იცი, რა უბედურება მოხდება ქვეყანაზე.

³ღრუბლები ივსებიან, წვიმას ღვრიან მიწაზე. როდესაც ხე წაიქცევა, სამხრეთით დაეცემა თუ ჩრდილოეთით, იქვე დარჩება, სადაც დაეცემა.

⁴ქარის მაყურებელი ვერ დათესავს და ღრუბლების შემყურე ვერ მომკის.

⁵როგორც არ იცი ქარის გზა და როგორ ისახება ძვლები ორსულის მუცელში, ისე ვერ შეიცნობ ღმერთის საქმეს, რომელიც ყოველივეს ქმნის.

⁶დილით დათესე და საღამოს ხელს ნუ გააჩერებ, რადგან არ იცი, რომელი უფრო სასიკეთოა: ეს თუ ის, თუ ორივე ერთნაირად სიეთეს მიიტანს.

⁷ტკბილია სინათლე და თვალისთვის საამურია მზის ჭვრეტა.

⁸თუნდაც მრავალი წელი იცხოვროს კაცმა და იხაროს ყოველი წლით, ახსოვდეს, რომ შავი დღეებიც მრავლად იქნება; და ყველაფერი, რაც მოვა, ამაოებაა.

⁹იხარე, ყრმაო, სიყმაწვილეში, გამხიარულოს გულმა ჭაბუკობის ხანს, მიჰყევი შენი გულის გზებს და შენს თვალთა სურვილს; მაგრამ იცოდე, რომ ყოველივე ამისთვის ღმერთი წარგადგენს სამსჯავროზე.

¹⁰გადაიყარე გულიდან დარდი და სხეულს არიდე ტკივილი, რადგან ბავშვობაცა და სიყმაწვილეც ამაოებაა.