Read სბს–2013 ეკლესიასტე 8 Bible Online

ეკლესიასტე 8 - სბს–2013 bible

ეკლესიასტე 8

¹ვინაა ბრძენის მსგავსი? და ვინ შეიცნობს საგანთა ბუნებას? ადამიანის სიბრძნე ანათებს მის სახეს და ცვლის მისი სახის სიმკაცრეს.

²აღასრულე მეფის ბრძანება, რადგან ღმერთისთვის გაქვს მიცემული ამის აღთქმა.

³ნუ იჩქარებ მისი პირისგან წასვლას და ნუ დადგები ჯიუტად ბოროტ საქმეზე, რადგან რასაც ის ინებებს, გააკეთებს.

⁴ვინაიდან მეფის სიტყვა ძალმოსილია; ვინ შებედავს უთხრას: რას აკეთებო?

⁵ბრძანების დამცველი შარში არ გაეხვევი; სამართლის დრო და ჟამი იცის ბრძენის გულმა.

⁶ვინაიდან ყველაფერს თავისი ჟამი და წესი აქვს, კაცის უბედურება კი ის არის,

⁷რომ მან არ იცის, რა მოხდება; რადგან ვინ ეტყვის მას, რა იქნება?

⁸კაცი ვერ შეაჩერებს ქარს, ვერ განაგებს თავისი სიკვდილის დღეს; ბრძოლის ველს ვერ დაუსხლტება ჯარისკაცი, უკეთურებით თავს ვერ გადაირჩენს.

⁹ყოველივე ვიხილე და გული მივაპყარ ყოველ საქმეს, რაც მზისქვეშეთში მომხდარა. ის დროც ვნახე, როდესაც კაცი კაცზე ბატონობდა და ბოროტებას შეამთხვევდა.

¹⁰ისიც ვიხილე, როგორ მარხავდნენ უკეთურთ და წმიდა ადგილიდან როგორ ბრუნდებოდნენ უკან; და ივიწყებდა ბოროტეულთ ქალაქი. და ესეც ამაოებაა.

¹¹რაკი მსწრაფლ არ ისჯება ბოროტი საქმეები, ამიტომ მიუწევს კაცს გული ბოროტებისკენ.

¹²თუმცა ვხედავ, რომ ცოდვილი ასჯერ სჩადის ბოროტებას და მაინც დიდხანს ცოცხლობს, – მე მაინც ვიცი, რომ მიეგებათ მადლი ღვთისმოშიშთ, რომელთაც ეშინიათ ღვთისა.

¹³არ მიეგებათ მადლი ბოროტეულთ და ლანდივით დღემოკლე იქნება ყველა, ვისაც ღმერთის არ ეშინია.

¹⁴არის ამაოება, რომელიც ხდება ქვეყნად: მართლებს ბოროტეულთა საქმეთამებრ მიეგებათ; და არიან ბოროტეულნი, რომელთაც მართალთა საქმეთაებრ მიეგებათ. და მე ვთქვი: ესეც ამაოებაა.

¹⁵და შევაქე მოლხენა, რადგან არაფერია უკეთესი კაცისთვის მზისქვეშეთში, ვიდრე სმა-ჭამა და განცხრომა. ეს ახლავს მას შრომასთან ერთად მთელი მისი დღენი, რომლებიც მისცა მას ღმერთმა მზისქვეშეთში.

¹⁶და როდესაც გული მივაპყარ იმას, რომ შემეცნო სიბრძნე და მომეხილა ყოველი საქმე, რაც ქვეყნად ხდება, დღედაღამ თვალის მოუხუჭავად,

¹⁷მაშინ ვიხილე ღმერთის ყოველი საქმე, და ის, რომ კაცი ვერ მისწვდება იმას, რაც ხდება მზისქვეშეთში: რამდენსაც არ უნდა დაშვრეს კაცი და ეძიოს, ვერას მიხვდება. თუნდაც რომ თქვას ბრძენმა, რომ ყოველივე იცის, ვერას მიხვდება.