Read სბს–2013 ეკლესიასტე 9 Bible Online

ეკლესიასტე 9 - სბს–2013 bible

ეკლესიასტე 9

¹ყოველივე ეს ჩავიდე გულში და გამოვიკვლიე, რომ მართალნი და ბრძენნი და მათი საქმენი ღმერთის ხელთაა. კაცმა არ იცის, წინ რა ელოდება – სიყვარული თუ სიძულვილი. და ყველაფერი, რაც ემართება

²ამაოებაა; ერთი ხვედრი აქვს ყველას: მართალსა და უკუღმართს, კეთილსა და ბოროტს, სუფთას და უწმინდურს, მსხვერპლის შემწირავსა და მსხვერპლის არ შემწირავს, კეთილსა და ბოროტს, მოფიცარსა და ფიცის მოშიშს.

³ესაა ცუდი მზისქვეშეთში, რომ ყველას ერთი ხვედრი აქვს; კაცთა გულები აღივსო ბოროტებით, და სიშლეგე ბუდობს მათ გულებში მთელი სიცოცხლე; მერე კი სიკვდილი მოდის.

⁴და ვიდრე ცოცხლობს კაცი, ნუგეშად აქვს: ცოცხალი ძაღლი მკვდარ ლომს სჯობიაო.

⁵რადგან ცოცხალმა იცის, რომ მოკვდება; მკვდრებმა კი არაფერი იციან და აღარც საზღაური მიეზღვებათ, რადგან მათი ხსოვნა უკვე დავიწყებას მიეცა.

⁶გაქრა მათი სიძულვილიც, შურიც და ტრფობაც; აღარ ექნებათ აღარასოდეს წილი იმაში, რაც მზის ქვეშ ხდება.

⁷მაშ მიდი და ლხენით ჭამე შენი პური და უდარდელად სვი შენი ღვინო, რადგან ღმერთმა მოიწონა შენი საქმენი.

⁸ქათქათა სამოსელი გეცვას ყოველდღე, და ნელსაცხებელი არ მოიკლო თავზე.

⁹საყვარელ ცოლთან სიამტკბილობით გაატარე ამაო დღენი, ღმერთმა რომ მოგცა მზისქვეშეთში, – ეს არის შენი წილი მზისქვეშეთში რუდუნებისთვის.

¹⁰აკეთე, რისი კეთების ძალაც შესწევს შენს ხელს, რადგან არც საქმე, არც ფიქრი, არც ცოდნა, და არც სიბრძნე არ გაგყვება შავეთში, სადაც მიდიხარ.

¹¹ისიც ვიხილე მზისქვეშეთში, რომ მკვირცხლთა ნებაზე არაა რბოლა, არც მამაცთა ნებაზეა ომი, არც ბრძენთა ნებაზეა პური, არც გონიერთა ნებაზეა სიმდიდრე, არც მცოდნეთა ნებაზეა მადლი; რადგან დრო და შემთხვევა განაგებს ყველაფერს.

¹²რადგან კაცმა არ უწყის თავისი ჟამი; ავ ბადეში გახლართული თევზივით და მახეში გაბმული ჩიტივით იქნება იგი შეპყრობილი ავბედით ჟამს, უეცრად რომ დაუდგება.

¹³კიდევ ასეთი სიბრძნე ვიხილე მზისქვეშეთში და დიდად ჩავთვალე ის:

¹⁴იყო პატარა ქალაქი და მცირე ხალხი ცხოვრობდა მასში. და აჰა, მოადგა მას დიდი მეფე და შემოარტყა მძლავრი ალყა.

¹⁵მაგრამ მოიძებნა იქ ღატაკი ბრძენი და მან გაადარჩინა ქალაქი სიბრძნით, მაგრამ არავის აღარ გახსენებია ის ღატაკი.

¹⁶და ვთქვი მე: „სიბრძნე სჯობს სიმამაცეს. მაგრამ ღატაკის სიბრძნეც აბუჩადაა აგდებული და მის სიტყვას არავინ უსმენს.“

¹⁷ბრძენის მშვიდად თქმული სიტყვა სჯობს მმართველის ყვირილს.

¹⁸სიბრძნე სჯობს ხმალ-ხანჯლის ქნევას, მაგრამ ერთ ცოდვილს ბევრის დაღუპვა შეუძლია.